Ministri në detyrë i Bujqësisë, Pylltarisë dhe Zhvillimit Rural, Armend Muja, ka deklaruar se fuqizimi ekonomik i grave është parakusht për zhvillimin e qëndrueshëm ekonomik të vendit, duke theksuar se mbështetja e grave në bujqësi dhe ndërmarrësi do të mbetet prioritet i politikave zhvillimore.
Në konferencën “Gratë në Biznes – She Rises”, Muja tha se përmes subvencioneve dhe granteve në vlerë prej rreth 80 milionë eurosh synohet rritja e produktivitetit dhe zhvillimi i sektorit të bujqësisë, duke krijuar më shumë mundësi për gratë që dëshirojnë të investojnë apo të zgjerojnë aktivitetet e tyre.
Sipas tij, në kuadër të skemave të subvencioneve do të ketë pikëzim shtesë dhe masa afirmative për gratë dhe vajzat aplikuese, si dhe mbështetje më të madhe për ato që nisin për herë të parë veprimtari bujqësore. Ndërkaq, përmes skemave të granteve do të krijohen grante të dedikuara për gratë në bujqësi dhe do t’u jepet prioritet projekteve të udhëhequra nga gratë.
Muja theksoi se sfidat kryesore që vazhdojnë të kufizojnë pjesëmarrjen e grave në bujqësi mbeten çështja e pronësisë dhe qasja në financa, duke bërë të ditur se po punohet për krijimin e mundësive të reja për gratë dhe të rinjtë.
Ai njoftoi gjithashtu se rreth 230 mijë hektarë tokë pyjore dhe bujqësore janë nën administrimin e ministrisë, ndërsa një pjesë e konsiderueshme e tokës bujqësore do të vihet në dispozicion për aktivitete bujqësore, me fokus të veçantë tek gratë dhe të rinjtë.
“Fuqizimi ekonomik i grave nuk është vetëm çështje e barazisë dhe drejtësisë sociale, por një parakusht i domosdoshëm për zhvillimin e qëndrueshëm ekonomik të vendit”, theksoi Muja.
