Trajneri i Real Madridit, Carlo Ancelotti, vlerësoi fitoren 1-0 ndaj Getafes, ndonëse e pranoi se pjesa e dytë e ndeshjes ishte e vështirë për skuadrën e tij. Goli i vetëm i takimit u shënua nga Arda Güler, një paraqitje që italiani e cilësoi si “plot cilësi dhe qetësi”.
“Jemi ndoshta pak të pakënaqur me mënyrën si u zhvillua pjesa e dytë, por nuk mund të jem i zhgënjyer sepse kemi marrë tri pikë. Luajtëm shumë mirë në pjesën e parë, pastaj vuajtëm pak në të dytën”, tha Ancelotti.
Vlerësime për Gülerin dhe kritika për Endrickun
Ancelotti lavdëroi Gülerin për lojën e tij si mesfushor i avancuar: “Ka shumë cilësi në ndërtimin e lojës. E ardhmja e tij është si mesfushor qendror, jo si sulmues. Mungon pak në duelet fizike, por teknikisht është fenomenal.”
Megjithatë, nuk munguan kritikat për talentin brazilian Endrick, i cili gaboi një mundësi të artë për shënim në pjesën e dytë, duke dështuar me një “panenka”. “Nuk mund të bëjë këto gjëra. Është i ri dhe duhet të mësojë, por në futboll të këtij niveli, nuk ekziston ‘teatri’. Duhet të gjuajë fort. Kaq.”
Pas gabimit, Ancelotti e zëvendësoi Endrickun menjëherë me Bellinghamin.
Lëndimi i Camavingas dhe përgatitjet për finalen e Kupës
Trajneri konfirmoi se Eduardo Camavinga është në dyshim për ndeshjen e së shtunës për shkak të një shqetësimi muskulor. Si alternativë për krahun e majtë të mbrojtjes përmendi Fran Garcían.
Sa i përket finales së Kupës së Mbretit ndaj Barcelonës, Ancelotti theksoi: “Në një finale duhet të mbrohesh mirë dhe pastaj do të kemi rastet tona në sulm. Barcelona favorit? Në një finale gjithçka është e mundur.”
Besimi tek Rodrygo dhe vlerësim për Brahimin
Ancelotti shprehu besim të plotë te Rodrygo për finalen, pavarësisht performancave të luhatshme së fundmi. Për Brahim Díaz, ai tha: “Ka bërë një ndeshje shumë të mirë në çdo aspekt. Na dha minuta të shkëlqyera edhe kundër Athletic.”
Real Madridi tani i kthen sytë nga finalja e Kupës dhe sfidat e mbetura në kampionat, me synimin për të mbyllur sezonin me trofe.s.net.
