Prokuroria Themelore në Prishtinë ka njoftuar se, në koordinim me Policinë e Kosovës, ka arrestuar një person të dyshuar për veprat penale “Keqpërdorimi i pozitës apo autoritetit zyrtar” dhe “Falsifikimi i dokumentit zyrtar”.
Sipas Prokurorisë, arrestimi është rezultat i hetimeve të zhvilluara nga Departamenti për Krime të Rënda, në bashkëpunim me Drejtorinë për Hetimin e Krimeve Ekonomike dhe Korrupsion.
Hetimet lidhen me dyshimet se i arrestuari, me inicialet N.M., ka tejkaluar kompetencat zyrtare duke lëshuar leje për disa operatorë ekonomikë për importin e produkteve biocide dhe pesticide që janë të ndaluara për përdorim në Republikën e Kosovës, sipas listës së Agjencisë Evropiane të Kimikateve (ECHA) të Bashkimit Evropian.
Me urdhër të Prokurorit të Shtetit, i dyshuari është ndaluar për 48 orë, ndërsa ndaj tij po zhvillohen hetime për veprat penale të parashikuara në nenin 414 dhe nenin 427 të Kodit Penal të Republikës së Kosovës.
Prokuroria Themelore në Prishtinë ka bërë të ditur se, në bashkëpunim me Policinë e Kosovës dhe institucionet e tjera kompetente, do të vazhdojë ndërmarrjen e të gjitha veprimeve hetimore për zbardhjen e plotë të rastit.
