Deputeti i Partisë Demokratike, Luan Baçi, u shpreh se, “Viti 2024 e gjeti Shqipërinë, nga një vend anëtar të NATO-s, aspirant për anëtar të Bashkimit Evropian, në një vend të rreshtuar ne krah të autokracive më të rrezikshme të globit”.
Në një deklaratë për mediat në lidhje me situatën politike, ai tha se, “2024 e gjeti Shqipërinë, me liderin e opozitës te burgosur pa ligj e Kushtetutë; me një opozitë nën një sulm frontal, të paprecedent, të zhveshur nga çdo e drejtë kushtetuese në parlament; me një qeveri që ka vendosur të emërojë vetë edhe opozitën, duke asgjësuar debatin politik në parlament; me një sistem drejtësi e të kapur politikisht, që i shërben vetëm interesave imediate politike të pushtetit. të një pushteti të kriminalizuar deri në palcë, partnerët e vetëm të qëndrueshëm të të cilit janë vetëm organizatat kriminale kombëtare dhe ndërkombëtare”.
“Me një qeveri që shpenzon miliarda të taksapaguesve më të varfër të Evropës, tek klientët e saj, e jo në arsim, jo në rroga e pensione, jo për të sotmen e të ardhmen e Shqipërisë, por për xhepat e tyre. Viti 2023 u mbyll me seanca parlamentare ‘4 minutëshe’, ku deputetë memecë të fshehur pas kartonëve, votuan për të shpenzuar buxhetin e shtetit sipas interesit të partisë e të patronazhistëve të saj, jo sipas nevojave të fëmijëve të Shqipërisë”, u shpreh Baçi.
Ai tha se, “duke nisur nga sot, cilido profesionist i lirë do e ketë edhe më të vështirë të përballet me jetën, pasi do t’i duhet të paguajë edhe taksat më të reja që miratuan për 4 minuta në seancën e fundit të parlamentit”.
Sipas tij, “duan të vendosin taksokracinë duke asgjësuar demokracinë. Prandaj u duhet një opozitë e emërua. Prandaj u duhet një opozitë me liderin nën arrest. Prandaj u duhet një opozitë e zhveshur nga e drejta kushtetuese për të hetuar dhe vënë para përgjegjësisë pushtetin e bashkëshortëve strategjikë, thjeshtrave që bëjnë miliarda me fonde shtetërore që firmosen fap, fap fap nga ‘njerku i artë’”.
“Partia Demokratike, deputetët e saj, strukturat që nga kryetari e deri tek anëtari më i ri, janë garancia se kjo nuk do të ndodhë kurrë. Vëllezër e motra që vuani njësoj këtë bandidokraci, pavarësisht bindjeve politike: Vetëm bashkë mund t’ia dalim! Dhe të bashkuar do ia dalim”, deklaroi Baçi.
