Bebe Rexha mori pjesë në para-ndejën e ‘Grammy Awards 2023’ të organizuar nga BMG, e cila u mbajt në Candela La Brea në Los Angeles të mërkurën.
Artistja 33-vjeçare u pa për herë të parë teksa pozoi për një set fotografish në tapetin e kuq të eventit, gjatë të cilit iu bashkua edhe miku i saj i mirë, Adam Lambert.
Kantautorja me origjinë shqiptare u ngjit në skenën kryesore të ngjarjes për të performuar për të pranishmit e tjerë, shkruan DailyMail.
Paraqitja e Rexhës në këtë event ndodhi vetëm disa javë pasi bashkëpunimi i saj me David Guettan, i titulluar “I’m Good (Blue)”, arriti të renditej në vendin e parë në top-listën e ‘Billboard Pop Airplay’.
Kënga, e cila është një ripërpunim i hitit të famshëm “Da Ba Dee” të vitit 1998 interpretuar nga grupi Eiffel 65, Blue (Da Ba Dee), u publikua fillimisht gushtin e kaluar.
Këngëtarja shqiptare dhe producenti francez kishin bashkëpunuar në disa këngë në të kaluarën, ku disa prej tyre u bënë hite më vete.
Dyshja kishin punuar më parë në këngën “I’m Good (Blue)” dhe e kishin lënë atë në raft për disa vite përpara se Guetta ta lëshonte për herë të parë publikisht në një koncert në vitin 2017.
Kënga nuk u bë shumë e njohur përpara se një përdorues i TikTok të publikonte një pjesë të këngës në një video që u shpërnda verën e vitit të kaluar.
Pasi videoja shkoi virale, Rexha dhe Guetta iu përveshën punës dhe e publikuan bashkëpunimin më 26 gusht.
Në një intervistë të fundit, Bebe Rexha tregoi se pse mendonte që kënga ishte bërë e njohur me dëgjuesit dhe iu kishte pëlqyer kaq shumë.
“Unë mendoj se njerëzit duan të ndiejnë atë nostalgji të viteve 2000, veçanërisht pas tre viteve të një pandemie dhe të ngujuarit në shtëpitë e tyre”, tha ajo.
