Presidenti i Shqipërisë Bajram Begaj dhe Presidentja e Kosovës përshëndetën sot marrëveshjen Izrael-Hamas të shpallur nga Presidenti i Shteteve të Bashkuara të Amerikës, Donald Trump.
Begaj e vlerësoi këtë arritje, që është faza e parë e planit të Presidentit Trump për paqen, si një “hap të rëndësishëm drejt paqes së qëndrueshme dhe të drejtë, ndërprerjes së armiqësive dhe lirimit të pengjeve”.
“Vlerësoj rolin e Presidentit Donald J. Trump për kontributin dhe përkushtimin e tij në arritjen e këtij procesi historik për paqen. Besoj se dialogu dhe mirëkuptimi mbeten rruga e vetme drejt një të ardhmeje të qëndrueshme në rajonin e Lindjes së Mesme”, tha Begaj.
Ndërkohë presidentja Osmani përmes një postimi në rrjetin social “X”, thotë se “të bekuar janë ata që bëjnë paqe” duke shpërndarë postimin e presidentit amerikan, Donald Trump.
Osmani e ka quajtur këtë marrëveshje si një moment definues për paqen e cila ëshë urgjente dhe shumë e kërkuar në këtë rajon.
“Presidenti, Donald Trump dhe administrata e tij kanë treguar lidership dhe përkushtim të vërtetë për të sjellë paqe të qëndrueshme si për izraelitët ashtu edhe për palestinezët, si dhe përkushtim të palodhur për t’i dhënë fund vuajtjeve që kanë duruar breza të tërë njerëzish të pafajshëm. Mirënjohja jonë shkon gjithashtu për ndërmjetësuesit nga Katari, Egjipti dhe Türkiyen për angazhimin e tyre të vazhdueshëm për paqen dhe për rolin e tyre vendimtar në bërjen e mundur të këtij përparimi”, ka shkruar ajo në X.
