Skuadra e Borës ka arritur një sukses historik, duke u kualifikuar për herë të parë në gjysmëfinale të “play off” në elitën e basketbollit kosovar.
Bora e ka mposhtur bindshëm Sigal Prishtinën me rezultat 101:60 në ndeshjen e dytë çerekfinale, duke e fituar serinë me rezultat të përgjithshëm 2:0. Edhe ndeshjen e parë e kishte fituar thellë, 105:67.
Takimi i zhvilluar në Pallatin e Rinisë dhe Sportit në Prishtinë është dominuar plotësisht nga Bora, që ka krijuar epërsi të madhe që në pjesën e parë (51:23) dhe e ka ruajtur atë deri në fund, duke triumfuar me dyzet e një pikë dallim.
Më i dalluari te Bora ka qenë Jordan Dingle me njëzet e katër pikë, ndërsa Carlton Bragg Jr ka kontribuar me dymbëdhjetë pikë dhe pesë kërcime.
Te Sigal Prishtina janë veçuar Arbër Sinani me shtatëmbëdhjetë pikë dhe Jon Ismajli me trembëdhjetë pikë.
Ky sukses vjen vetëm një vit pasi Bora kishte luftuar për mbijetesë në elitë, duke fituar “play out” ndaj KEK-ut. Tani, skuadra prishtinase do të përballet në gjysmëfinale me Bashkimin, që e përfundoi sezonin e rregullt në vendin e dytë dhe do të ketë përparësinë e terrenit vendas.
