Komisionerja e Agjencisë për Informim dhe Privatësi, Krenare Sogojeva-Dermaku, ka marrë pjesë në takimin e radhës të Bordit Evropian për Mbrojtjen e të Dhënave Personale (EDPB).
Në mbledhjen e radhës të Bordit Evropian për Mbrojtjen e të Dhënave Personale (EDPB) ka miratuar Opinonin e Përbashkët 1/2026 për Inteligjencën Artificiale – “Digital Omnibus on AI” (Paketë ndryshimesh ligjore digjitale që prekin disa rregullore ekzistuese).
Në njoftimin e Agjencisë për Informim dhe Privatësi thuhet se opinioni mbështet iniciativat për thjeshtimin e kuadrit rregullator digjital dhe rritjen e konkurrueshmërisë në Bashkimin Evropian dhe Bordi ka theksuar se çdo ndryshim duhet të garantojë ruajtjen e standardeve të larta të mbrojtjes së të dhënave personale dhe respektimin e të drejtave themelore të qytetarëve.
“Diskutimet në takim mbështeten masat që synojnë lehtësimin e barrës administrative për organizatat, përfshirë zgjatjen e afateve për njoftimin e shkeljeve të të dhënave dhe përdorimin e modeleve të harmonizuara për vlerësimet e ndikimit në privatësi dhe mbrotjen e te dhënave personale”, thuhet në njoftim.
Në kuadër të këtij takimi, EDPB miratoi edhe Programin e Punës 2026–2027, i cili parashikon harmonizimin e mëtejshëm të zbatimit të GDPR-së, forcimin e bashkëpunimit ndërmjet autoriteteve mbikëqyrëse dhe hartimin e udhëzimeve të reja, përfshirë ato mbi anonimizimin, pseudonimizimin, mbrojtjen e të dhënave të fëmijëve dhe përdorimin e inteligjencës artificiale”, thuhet më tej në këtë njoftim.
“Angazhimi aktiv i Agjencisë për Informim dhe Privatësi në punimet e EDPB-së i mundëson Republikës së Kosovës të ndjekë zhvillimet më të fundit rregullatore dhe të kontribuojë në proceset konsultative që lidhen me zbatimin e kuadrit ligjor evropian për mbrojtjen e të dhënave personale
Pjesëmarrja e Kosovës në këto procese është me rëndësi të veçantë për përafrimin gradual të legjislacionit dhe praktikave vendore me standardet evropiane, si dhe për përgatitjen e institucioneve publike dhe private ndaj zhvillimeve rregullatore në nivel të Bashkimit Evropian, veçanërisht në fushën e sistemeve automatike dhe inteligjencës artificiale”, thuhet në njoftimin e Agjencisë për Informim dhe Privatësi.
