Brukseli po monitoron nga afër nëse Serbia i përmbush kërkesat e Bashkimit Evropian për qetësimin e tensioneve në veri të Kosovës dhe nëse gjykon se Beogradi nuk i respekton ato, është i gatshëm të shqyrtojë vendosjen e masave ndëshkuese ndaj autoriteteve në Serbi, tha kreu i diplomacisë së BE-së, Josep Borrell.
Në përgjigje të një pyetjeje parlamentare të parashtruar në muajin qershor, pas konfliktit para ndërtesave komunale në veri të Kosovës, ai përsëriti se “de-përshkallëzimi duhet të ndodhë tani, nga të dyja palët” dhe se aktet e dhunshme si ajo e 29 majit janë “plotësisht të papranueshme dhe nuk mund të përsëriten në të ardhmen”, raporton N1.
Në letër, kujtohet se më 3 qershor, Borell, në emër të BE-së, i ka bërë thirrje Kosovës dhe Serbisë që të marrin masa të menjëhershme dhe të pakushtëzuara për qetësimin e situatës në veri të Kosovës, për krijimin e kushteve për zgjedhje të jashtëzakonshme në të katër komunat në veri të Kosovës, me pjesëmarrjen e pakushtëzuar të serbëve të Kosovës, të veprojnë me përgjegjësi dhe të zbatojnë menjëherë Marrëveshjen për Rrugën e Normalizimit të Marrëdhënieve dhe Aneksin e saj, e cila përfshinë, pa asnjë vonesë apo parakushte të mëtejshme, fillimin e punës për themelimin e Asociacionit/Bashkësisë së Komunave me shumicë serbe.
