Kreu i diplomacisë evropiane, Josep Borrell, konfirmoi se Johan Floderus, një diplomat suedez që punon për BE-në, është ndaluar në Iran për më shumë se 500 ditë dhe se Unioni Evropian po punon për lirimin e tij, transmeton Kosova Post.
“Dua të theksoj se personalisht, i gjithë ekipi im në të gjitha nivelet – institucionet evropiane në bashkëpunim të ngushtë me autoritetet suedeze, të cilët kanë përgjegjësinë e parë për mbrojtjen konsullore – dhe me familjen e tij, ne po i shtyjmë autoritetet iraniane ta lirojnë atë.” tha Borrell të martën në qytetin spanjoll Cadiz.
Një ditë më parë, Suedia dhe BE-ja raportuan se një suedez 33-vjeçar ishte arrestuar në rastin më të fundit të njohur të një të huaji të arrestuar atje mes tensioneve politike me Perëndimin.
As Stokholmi dhe as Brukseli nuk e përmendën emrin e personit të arrestuar, por New York Times, duke cituar burime diplomatike, identifikoi Floderus si diplomatin pas hekurave.
Zëdhënësi i Ministrisë së Jashtme të Iranit, Naser Kanani tha të hënën se ai nuk ishte në dijeni të rastit.
Megjithatë, Ministria e Inteligjencës tha se shtetasi suedez ishte përfshirë në listën e “të dyshuarve” të njësisë së kundërzbulimit për shkak të “sjelljes dhe komunikimeve të dyshimta” gjatë udhëtimeve të mëparshme në Iran.
Forcat e sigurisë të Iranit kanë arrestuar rreth 40 shtetas të huaj gjatë trazirave të vendit, shpesh pa akuza.
Perëndimi vë në dukje se Irani po përpiqet të përfitojë nga vendet e huaja duke marrë peng të huajt dhe shtetasit me shtetësi të dyfishtë, në mënyrë që t’i përdorë për shkëmbimin e të burgosurve.
Marrëdhëniet midis Teheranit dhe Stokholmit janë acaruar më tej muajt e fundit pasi një burrë grisi dhe dogji librin e shenjtë mysliman, Kuranin, përpara një xhamie në kryeqytetin suedez në korrik. Në shenjë proteste, Irani po përmbahet nga dërgimi i një ambasador të ri në Suedi.
