Brenda një viti, borxhi i Serbisë në bazë të eurobonove të emetuara u rrit me 1.4 miliard euro në një total prej 10.3 miliardë eurosh, sipas të dhënave nga Administrata e Borxhit Publik. Serbia u detyrohet më së shumti para investitorëve që investuan në eurobono – më shumë se 10.3 miliardë euro.
Më pas vjen borxhi i bazuar në letrat shtetërore me vlerë afatgjata të emetuara – 7.4 miliardë euro, dhe vetëm më pas kreditë nga bankat komerciale në vlerë prej 4 miliardë eurosh.
Serbia u detyrohet 3.2 miliardë euro kredi qeverive të huaja, 3.2 miliardë euro Bankës Kineze të Eksportit-Importit dhe 2.5 miliardë euro FMN-së, sipas raportit të fundit mujor të Administratës së Borxhit Publik për shkurt 2025, transmeton KosovaPress.
Renditja e pesë kreditorëve kryesorë sipas shumës së borxhit publik të Serbisë është pothuajse e njëjtë me një vit më parë, por disa nga shumat janë zgjeruar ndjeshëm. Kështu, në fund të shkurtit 2024, Serbia kishte 8.9 miliardë euro borxh për eurobono të emetuara – ky borxh u rrit 1.4 miliard euro në një vit.
Borxhi i bazuar në letrat me vlerë afatgjatë të dinarit serb u zvogëlua për 36 milionë euro, por borxhi për kreditë nga bankat komerciale u rrit 1.05 miliard euro. Vitin e kaluar ishte 2.95 miliardë euro, ndërsa tani është 4 miliardë euro.
Në listën e 2024 të kreditorëve të borxhit publik të Serbisë, këto kredi ishin në vendin e katërt për nga shuma e borxhit, ndërsa tani kanë rënë në të tretin – kanë zëvendësuar kreditë e huaja, të cilat janë ulur për 104 milionë euro për 12 muaj. Borxhi ndaj Bankës së Eksport-Importit të Kinës është rritur për 489 milionë euro.
E njëjta gjë vlen edhe për borxhin ndaj FMN-së, i cili nga shkurti 2024 e deri në këtë vit është rritur me 78 milionë euro.
Serbia gjithashtu i detyrohet Bankës Ndërkombëtare për Rindërtim dhe Zhvillim 2.2 miliardë euro, Bankës Evropiane të Investimeve 1.8 miliardë euro dhe investitorëve në letrat me vlerë afatgjata të qeverisë serbe në euro – 1.5 miliardë euro.
Borxhi publik i Serbisë arrin në 39.05 miliardë euro ose 44.3 për qind e GDP-së, sipas të dhënave të fundit progresive të Administratës së Borxhit Publik. Kur kësaj shume i shtohet edhe borxhi i pa garantuar i autoriteteve vendore, shuma totale shkon në 39.29 miliardë euro.
Pjesa e borxhit publik të qeverisë qendrore në produktin e brendshëm bruto në fund të shkurtit 2025 ishte 44.3 për qind, dhe pjesa e borxhit publik të sektorit shtetëror në GDP ishte 44.6 për qind. Borxhi publik i qeverisë qendrore në shkurt 2025 u rrit për 7 miliardë dinarë krahasuar me muajin paraardhës dhe arriti në 4,576,5 miliardë dinarë (39.1 miliardë euro).
Pesha e borxhit publik në valutë në fund të shkurtit 2025 është 78 për qind. Pjesa e borxhit publik në euro është 57.4%, në dollarë amerikanë 13.9%, në të drejta speciale të tërheqjes (SDR) 6.4% dhe në valuta të tjera të huaja 0.4%.
Kujtojmë, SDR-ja është një aktiv rezervë ndërkombëtar i krijuar nga FMN-ja për të plotësuar rezervat zyrtare të vendeve anëtare. SDR-ja nuk është monedhë.
