Banka Qendrore e Kosovës ka konfirmuar se do të marrë pjesë në takimin në Bruksel lidhur me ndalimin e përdorimit të dinarit si mjet pagese në Kosovë.
Në përgjigje nga BQK-ja është thënë se kohë më parë ka shprehur gatishmërinë për angazhim që të takohet edhe me Bankën Popullore të Serbisë (NBS).
“Banka Qendrore e Republikës së Kosovës (BQK) kohë më parë ka shprehur gatishmërinë që të angazhohet dhe takohet edhe me Bankën Popullore të Serbisë (NBS), për të fasilituar në përzgjedhjen e opsionit me të lehtë për procesin e transferimit të mjeteve përmes kanaleve bankare në llogaritë e përfituesve (në Euro)..Në këtë kuptim, edhe i përgjigjet ftesave kur janë të nevojshme, për takime të tilla informuese, siç edhe ka bërë në vazhdimësi edhe me prezencën ndërkombëtare në vend”, thuhet në përgjigjen e BQK-së.
Bashkimi Evropian ka konfirmuar se të martën do të mbahet takimi në mes të Kosovës e Serbisë për të diskutuar “çështjen e dinarit”.
Zëdhënësja e BE-së, Nabila Massralli, ka thënë se të dyja palët kanë konfirmuar se do të dërgojnë përfaqësuesit e tyre për këtë takim.
Ajo, gjithashtu, ka thënë se takimi do të zhvillohet në “formatin e zakonshëm i dialogut”.