Të dielën e 23 prillit, zgjedhjet e parakohshme lokale mbahen në komunat: Mitrovicë e Veriut, Zubin Potok, Zveçan dhe Leposaviq – të gjitha të banuara me shumicë serbe.
Komunat në veri janë pa kryetarë qysh nga nëntori i vitit të kaluar, kur zyrtarët serbë të kësaj zone kanë dhënë dorëheqje nga institucionet e Kosovës, për shkak të një vendimi të Qeverisë në Prishtinë për t’i riregjistruar makinat me targa të paligjshme serbe.
Situata në këtë pjesë të Kosovës po vazhdon të jetë me tensione dhe me provokime të herë pas hershme.
Për këtë çështje në një prononcim për “Bota sot” foli ish-ambasadori i Holandës në Kosovë, Robert Bosch.
Sipas tij, Beogradi më qëllim krijoi vakum në veri, ku edhe ndikoi në tërheqjen e Listës Serbe nga institucionet e Kosovës.
ImageIsh-ambasadori i Holandës në Kosovë, Robert Bosch.FOTO GALERI
Ai vlerëson se zgjedhjet duhet të mbahen dhe se Qeveria e Kosovës nuk mund të fajësohet për situatën e krijuar.
“Pas tërheqjes së Listës Serbe dhe me atë të sistemit policor dhe gjyqësor, Beogradi krijoi me dëshirë një vakum veçanërisht në veri. Sigurisht që një qeveri serioze duhet ta mbushë këtë vakum dhe të tregojë se kishte kontroll. Duke qenë se askush nuk përjashtohet nga pjesëmarrja, përkundrazi qeveria i ka kërkuar LS të marrë pjesë. Kështu që tani do të zhvillohen zgjedhjet. Jo në rrethana ideale, por nuk mund të fajësohet qeveria për këtë”, deklaroi ish-ambasadori.
Më tej, Bosch e pranoi se situata në komunat veriore nuk është shumë e qetë dhe mund të përshkallëzohet nga grupet e mbështetura nga Rusia.
Megjithatë, shpreson që zgjedhjet të shkojnë mirë dhe të mos përfshihet shumë Beogradi.
“Shpresoj se gjërat do të shkojnë mirë të dielën dhe se Beogradi do të kufizojë përfshirjen e tij (mjaft keq) për të bojkotuar, por jo për dhunë. Ky i fundit nuk është në interes të Beogradit pasi duke parë reagimet e tyre ndaj propozimit të paqes të BE-së ka humbur pothuajse të gjithë simpatinë. Por grupet ekstremiste të mbështetura nga Rusia ende mund të përpiqen të shkaktojnë telashe. Le të shpresojmë që jo”, theksoi Robert Bosch për “Bota sot”.
