Ministri serb i Punëve të Jashtme, Ivica Daçiç, deklaroi se në këtë moment vendosja e sanksioneve ndaj Rusisë nuk është në interes të Serbisë.
Kjo, pasi mund të ndikojë negativisht edhe në mbështetjen politike për Kosovën.
Lajmi u bë i ditur nga transmetuesi “N1 Info”.
Nuk ka asnjë arsye për të ndryshuar qëndrimin tonë, ne do të vlerësojmë vendosjen e sanksioneve kundër Rusisë në përputhje me interesat tona”, u shpreh Daçiç. “Për momentin nuk është në interesin tonë, sepse përveç në atë ekonomik, mund të ndikojë negativisht edhe në mbështetjen politike kur është fjala për Kosovën”.
Ai shtoi se Serbia nuk do të vendosë sanksione ndaj Rusisë derisa një vendim i tillë t’i shërbejë qëllimit të ruajtjes së interesave kombëtare të vendit.
I pyetur nëse në muajt e fundit ka pasur një kthesë në politikën e Serbisë ndaj Rusisë, Daçiç tha se nuk ka pasur asnjë ndryshim në marrëdhëniet mes të dyja vendeve.
“Siç tha presidenti i Serbisë (Aleksandar Vuçiç), ne do të vlerësojmë kufirin në të cilin mund t’i rezistojmë presioneve të këtij lloji. Kufiri është kur do të bëhej e paqëndrueshme për Serbinë”, theksoi shefi i diplomacisë serbe.
