Themeluesi i Agjencisë së Lajmeve Kosova Post, Fadil Pushkolli, ka reaguar ashpër ndaj deklaratës së Asociacionit të Gazetarëve të Kosovës (AGK), duke e cilësuar atë si skandaloze dhe politikisht të motivuar.
Reagimi i Pushkollit vjen pas qëndrimit të AGK-së kundër deklaratës së kryeministrit në detyrë, Albin Kurti, i cili kishte kërkuar hetim nga organet e drejtësisë dhe sigurisë në lidhje me exit-pollet e publikuara nga tri televizione vendore gjatë zgjedhjeve lokale.
“Është skandaloze që AGK del në mbrojtje të publikimeve të tilla, që kanë ngritur dyshime të forta për manipulim të opinionit publik. Edhe më skandaloze është heshtja e gazetarëve anëtarë të këtij asociacioni ndaj një deklarate që nuk mbron interesin e profesionit, por duket se përputhet me agjenda të tjera,” – tha Pushkolli.
Ai shtoi se liria e medias nuk nënkupton paprekshmëri nga përgjegjësia, dhe theksoi se gazetaria nuk mund të përdoret si mburojë për të ndikuar në proceset zgjedhore përmes metodave të dyshimta.
“AGK duhet të jetë zë i etikës, jo i propagandës. Nëse s’ka reagim të brendshëm, atëherë ky asociacion e ka humbur kredibilitetin për të përfaqësuar gazetarët e ndershëm të Kosovës,” – theksoi ai.
Deklarata e Pushkollit ka nxitur diskutime të reja rreth rolit të mediave, përgjegjësisë gazetareske dhe kufirit midis lirisë së shprehjes dhe ndërhyrjes në opinionin publik, veçanërisht në një kohë kur zgjedhjet dhe demokracia janë në fokus të debatit publik.
