Drejtoresha e Klinikës së Nefrologjisë në Qendrën Klinike Universitare të Kosovës (QKUK), Mimoza Berbatovci–Ukimeraj, ka dhënë dorëheqje nga pozita e saj, pas pesë vitesh udhëheqje të këtij shërbimi.
Përmes një postimi në Facebook, ajo ka bërë të ditur se vendimi është marrë pas një periudhe të gjatë përpjekjesh për të ushtruar funksionin me profesionalizëm, transparencë dhe integritet.
Sipas saj, gjatë mandatit janë krijuar rrethana të vështira pune, të shoqëruara me mungesë bashkëpunimi institucional me strukturat drejtuese të SHSKUK-së dhe QKUK-së, si dhe me presione që, sipas saj, kanë ndikuar në pavarësinë profesionale dhe në realizimin e përgjegjësive të pozitës.
“Ky vendim vjen pas një periudhe të gjatë përpjekjesh për të ushtruar detyrën me profesionalizëm, integritet dhe transparencë, në rrethana të karakterizuara nga mungesa e bashkëpunimit institucional me strukturat udhëheqëse të SHSKUK-së dhe QKUK-së dhe nga presionet e vazhdueshme që kanë cenuar pavarësinë time profesionale si dhe kanë pamundësuar ushtrimin normal të përgjegjësive që burojnë nga kjo pozitë. Kam qenë dhe mbetem e bindur se çdo funksion drejtues duhet të ushtrohet mbi bazën e ligjit, etikës profesionale, bashkëpunimit institucional dhe respektit të ndërsjellë. Kur këto parime mungojnë dhe kur krijohen kushte që pengojnë realizimin e përgjegjësive në interes të pacientëve, stafit dhe institucionit, dorëheqja bëhet një akt përgjegjësie dhe integriteti profesional dhe personal, e kurrsesi tërheqje nga përgjegjësia”, ka shkruar Berbatovci–Ukimeraj.
Gjatë kohës sa ishte në krye të Klinikës së Nefrologjisë, ajo ka përmendur disa projekte të realizuara, përfshirë funksionalizimin e Qendrës së Hemodializës në Rahovec, nisjen e shërbimit të hemodializës në Podujevë, si dhe përmirësimin e shërbimeve nefrologjike dhe pajisjeve mjekësore.
Ajo ka bërë të ditur se disa iniciativa të tjera mbeten në proces, ndër to zhvillimi i shërbimit të biopsisë renale, renovimi i njësive të hemodializës dhe sigurimi i pajisjeve të reja për trajtimin e pacientëve.
Berbatovci–Ukimeraj ka theksuar se çdo funksion drejtues duhet të udhëhiqet nga ligji, etika profesionale dhe bashkëpunimi institucional, me synim ofrimin e shërbimeve më të mira për pacientët./teve1.info/
