Kryetarja e Lëvizjes Evropiane të Serbëve në Kosovë, Rada Trajkoviq, më 29 korrik tha se arrestimi i Milan Radoiçiqit ishte një nga kushtet për vizitën e presidentit francez Emmanuel Macron në Beograd.
Në një intervistë për BETA-n, Trajkoviq tha se presidenti serb Aleksandar Vuçiq do të duhet të arrestojë Radoiçiqin për ngjarjet në Banjskë brenda muajit të ardhshëm, kur pritej të ndodhte vizita e Macron.
Politikania serbe e Kosovës kujtoi se gjatë vizitës së Vuçiqit në Francë prillin e kaluar, Macron tha se ishte e rëndësishme që pjesëmarrësit në sulmin në Banjska të arrestoheshin.
“Vuçiq është nën presion të konsiderueshëm ndërkombëtar për shkak të bashkëpunëtorit të tij të ngushtë Milan Radoiçiç. Shtetet e Bashkuara kanë rënë dakord që ai të gjykohet në Beograd, që do të thotë se nuk ka presion për të ekstraduar Radoiçiqin dhe grupin e tij në Prishtinë. Vuçiq premtoi se Radoiçiç do të gjykohej, dhe pritja është që ai të arrestohet para ardhjes së presidentit francez Emmanuel Macron”, shpjegoi Trajkoviq.
Trajkoviq ka theksuar se është shumë më e lehtë për Vuçiçin të heqë dorë nga një pjesë e territorit të Serbisë dhe të pranojë shfrytëzimin e minierave të litiumit, sesa të heqë dorë nga njerëzit që zbatuan urdhrat e tij. Ajo tha gjithashtu se arrestimi i Radoiçiqit do të përbënte një rrezik të madh për Vuçiqin.
“Nëse drejtësia serbe do të fillonte të merrej me Banjskën dhe Radoiçiqin, do të ishte një mundësi që shërbime të ndryshme të huaja të ofrojnë të dhëna të inteligjencës, si në disa gjykime të tjera të grupeve të organizuara kriminale. Në atë rast, Vuçiq nuk do të mund ta shpëtonte Radoiçiqin nga dhënia e llogarisë për veprimet e tij”, tha ajo.
E pyetur nëse ekziston mundësia që Perëndimi ta falë Vuçiqin “për rastin Banjska”, Trajkoviq tha se Evropa udhëhiqet nga prioritetet e saj.
Duke komentuar faktin se presidenti i Serbisë rrallë herë e përmend Kosovën në fjalimet e tij të përditshme, Trajkoviq tha se Vuçiq po përpiqet të fshehë “rrobat e tij të pista”, shkruan A2CNN.“Vuçiq po përpiqet të fshehë dështimin e tij. Ai do që populli ta harrojë Kosovën. Makinerisë së tij mediatike tani i është dhënë detyra e re për të promovuar hapjen e minierës së litiumit. Shpresoj që njerëzit në Serbinë qendrore të mos bien pas premtimeve të rreme, siç u ndodhi serbëve në Kosovë”, tha Trajkoviq.
