Presidenti i Federatës Shqiptare të Futbollit, Armand Duka, ka deklaruar se objektivi kryesor i është kualifikimi për herë të parë në Kupën e Botës.
Ky deklarim ka ardhur pasi institucioni që ai e drejton i ka zgjatur kontratën trajnerit brazilian Sylvinho deri në vitin 2025.
“Projekti i nisur me trajnerin Sylvinho dhe stafin e tij, Zabaleta e Doriva, nuk mund të ndalej. Në asnjë moment nuk kemi pasur dyshime për vazhdimësinë dhe tani edhe e kemi konkretizuar me hedhjen e firmës mbi kontratë, deri në dhjetor të vitit 2025. Që në fillim kishim synim kualifikimin në Euro 2024 dhe ia dolëm. Tani e gjithë vëmendja është për të shkuar për herë të parë në Kupën e Botës. Besimi se mund t’ia dalim është prezent dhe stafi teknik, futbollistët dhe e gjithë Federata do të punojnë për të arritur këtë qëllim”, ka reaguar Duka me një mesazh në rrjetet sociale.
Nga ata tjetër, trajneri brazilian ka thënë se ripërtërirja e kontratës nënkupton vazhdimin e punës.
“Jam shumë i lumtur me rinovimin e kontratës time dhe të stafit teknik deri në dhjetor 2025. Është vazhdimi i punës që nisi një vit e shtatë muaj më parë, me synimin për t’u kualifikuar në finalet e Kampionatit Evropian, gjë e cila u realizua. Ne u përballëm si të barabartë me çdo rival në Euro 2024 dhe dolëm nga turneu krenarë për atë që bëmë. Por tani është koha për të ecur përpara dhe për t’u përballur me sfida të reja. Jemi gati për këtë. Forca Shqipëri!”, ka shkruar braziliani./rtk
