Presidenti Rexhep Taip Erdogan u shpreh i sigurt se do të jetë fituesi i zgjedhjeve në Turqi.
Duke folur në ceremoninë e hapjes së fazës së parë të Qendrës gjigante Financiare të Stambollit, presidenti turk theksoi se “me rritjen e konkurrencës tregtare midis Azisë dhe Evropës” politika e qeverisë po hap dritare të reja mundësish në Stamboll dhe po forcon pozicionin gjeopolitik të Turqisë.
Presidenti turk iu referua edhe zgjedhjeve presidenciale të 14 majit.
“Vendi ynë është në proces zgjedhjesh që do të mbahen më 14 maj. Pas 27 ditësh do të shkojmë në zgjedhje dhe do të marrim një vendim vendimtar për të ardhmen e Turqisë. Ne do të bëjmë një zgjedhje të rëndësishme jo vetëm mes kandidatëve, partive dhe aleancave, por edhe mes dy perceptimeve të ndryshme. Ne besojmë se kombi ynë do të jetë në favor të një politike pune, shërbimesh dhe investimesh siç ka qenë për 21 vjet.
Rrugëtimi i zhvillimit ekonomik nuk do të ndërpritet. Populli ynë, që e ka njohur Turqinë para vitit 2002, nuk do ta lejojë veten të kthehet nga fitimet demokratike dhe ekonomike që kanë bërë duke paguar edhe çmimin kur ka qenë e nevojshme. Kombi ynë i dashur do ta fillojë shekullin e Turqisë duke thënë bismillah (Në emër të Allahut). Si një politikan që e mati pulsin e sheshit prej 40 vitesh, nuk kam as më të voglin dyshim për ngjyrën e kutisë së votimit”.
