Një grup i nxënëseve prej 10 vetave të fshatit Prush të komunës së Gjakovës, sot nuk kanë vijuar mësimin.
Krejt kjo ka ndodhur për shkak të pamundësisë për transport, sepse shkollat në të cila vijojnë mësimin nxënësit janë cikli i ulët 6 kilometra larg dhe cikli më i lartë që udhëtojnë në një shkollë 9 kilometra larg vendit ku banojnë.
“Nuk janë shku puna e tenderit, kemi pas problem gjithë me transport, përveç këtyre mandatit të parë të Adrian Gjinit. Problem kemi pas edhe në kohë të Mimozës. Tash prapë ka filluar puna me tenderë. Deri në ciklin e pestë fëmijët i dërgojmë në shkollë në Rugovë që është 6 kilometra larg, ndërsa cikli më i lartë në një fshat më larg që është 9 kilometra larg. Kemi pasur transport publik, tash kemi bërë si të mundemi, sepse dikush punon dhe e dërgon fëmijën. Tash e tri javë është bërë ndalja e transportit publik, sepse fillimisht shoferi me shpenzime të veta i ka dërguar, por i ndali. Kanë thënë se nuk u dal tenderi, kanë bërë ankesa dhe jemi në pritje. Kjo ndodh vazhdimit.”, ka thënë njëri prind.
Një tjetër banor, ka treguar se deri më tani që tre javë kanë bartur fëmijët me vetura për në shkollë, por që është e pamundur për shkak të kushteve.
“Është e vështirë sepse është shumë larg, unë i baj të gjithë këta nxënës me një golf 2 dhe i dërgoj në shkollë. Kombinohemi herë unë herë një prind tjetër. Këtë herë s’kemi qenë për ankesa, por veç po shtyhen për tenderë, ne po shihet se nuk kemi kushte. Në këtë fshat janë 12 shtëpi, njëra nga shtëpitë është shpërngulur për shkak të largësisë së shkollës.”, ka thënë një gjysh që dërgon nipërit dhe mbesat e tij në shkollë.
Lidhur më këtë, kryetari i Komunës së Gjakovës, Ardian Gjini ka thënë se shumë shpejt do të rregullohet, madje e ka quajtur si problem që nuk ka natyrë të pazgjidhshme.
“Kemi provuar këtë vit më i shndërrua linjat e veçanta në linjën e përgjithshme, kjo ka shkaktuar vonesa por jemi shumë afër në rregullimin. Sepse për fshatra të veçantë kemi pas linja të veçanta e këtë vit kemi provuar që të kemi linja të përhershme të autobusëve të nxënëseve që të kursejmë buxhet dhe të ketë efikasitet më të madh në transport. Kemi bërë disa zgjidhje dhe shumë shpejt do të rregullohet. S’është problem i natyrës së pa zgjidhshme, por shpresoj që shumë shpejt do të ketë zgjidhje të përhershme, nxënësit patjetër do të transportohen sepse është obligim ligjor, duhet pak durim.”, ka thënë Gini në “Mëngjesi me Arben Ahmetin”.