Kryeministri Albin Kurti ka njoftuar për takimet që ka zhvilluar dje në New York, në ditën e tretë të vizitës atje.
Kurti bën të ditur se në takimin që pati me Ndihmës Sekretarin e Shtetit, James O’Brien, Zëvendës Ndihmës Sekretarin e Shteteve të Bashkuara të Amerikës për Ballkanin Perëndimor, Alexander Kasanof dhe emisarin e BE-së, Miroslav Lajçak, me të cilët ka thënë se ka pasur biseda produktive
Diskutimet mes tyre u përqendruan në dialog dhe Procesin e Berlinit.
Kurti tha mbrëmë se gjatë takimit ka theksuar nevojën e nënshkrimit dhe zbatimit të Marrëveshjes Bazike dhe Aneksit të saj.
“Diskutuam për dialogun si dhe bashkëpunimin rajonal përpara 10 vjetorit të procesit të Berlinit. Gjatë bisedës sonë, theksova nevojën e nënshkrimit dhe zbatimit të Marrëveshjes Bazike dhe Aneksit të saj si mjet i domosdoshëm për progres. Rikonfirmova gjithashtu përkushtimin e vendit tonë për bashkëpunim, prosperitet të rajonit, të drejta të barabarta dhe mbrojtje të fuqishme të të drejtave të njeriut dhe një shoqëri shumëetnike të lulëzuar”, shkroi Kurti në llogarinë e tij në platformën “X”.
Kujtojmë se Kurti gjatë takimit me O’Brien dhe me Lajçak, ka thënë se Kosova është e përkushtuar në procesin e normalizimit të raporteve Kosovë-Serbi, sipas parimeve të Marrëveshjes Bazike të Brukselit dhe Aneksit të Ohrit.
Ndërsa në takimin me kryeministrin e Kroacisë, Andrej Plenkoviq,u bisedua për sigurinë në Ballkan, ku kryeministri Kurti ka theksuar se Serbia mbetet faktor destabilizues e kërcënues i rajonit.
