Në kryeqytetin e Francës, Paris u mbajt një protestë kundër projektligjit “siguria e përgjithshme” i cili ndalon publikimin e pamjeve në media të forcave të sigurisë që janë në detyrë, transmeton Kosova Post.
Rreth orëve kur projektligji filloi të diskutohej në parlamentin kombëtar, mijëra persona protestuan duke u mbledhur në bulevardin Saint-Germain në afërsi të ndërtesës së parlamentit.
Herë-herë ka patur përleshje mes policisë dhe protestuesve në mesin e të cilëve kishte juristë, gazetarë dhe “jelekët e verdhë”. Policia ndërhyri me gaz lotsjellës dhe ujë me presion ndaj grupit protestues.
Nadia, një nga prostestueset në një deklaratë për AA tha se jeton në një prej zonave periferike të Parisit në të cilën shfaqet shumë herë dhuna policore.
“Ne e dimë se çfarë përjetojmë dhe fatkeqësisht e përjetojmë shpeshherë. Nëse (në parlament) miratohet projektligji, nuk do të rrezikohet vetëm jeta e qytetarëve por në të njëjtën kohë do të ndikojë në masë të madhe edhe gazetarët, mediat që paraqesin këtë dhunë”, tha Nadia duke shtuar se projektligji nuk duhet të miratohet nga parlamenti.
Ajo mbrojti idenë se kanë të drejtë të regjistrojnë pamjet e policëve dhe se kjo e drejtë nuk duhet t’u merret.
“Duhet të regjistrojmë pamjet e atyre (policëve), është e drejtë që ata bëjnë punë të mrekullueshme por nuk mund të mohojmë ngacmimet dhe ngjarjet e dhunës. Duhet të zbulojmë se kush janë ata”, tha Nadia, duke tërhequr vëmendjen se dhuna e zbatuar nga forcat e sigurisë nuk do të mund të provohet nëse i hiqet e drejta për të regjistruar pamje.
“Nuk mund të jemi të sigurtë nëse media nuk kryen detyrën për të na informuar. Për këtë arsye kam marrë pjesë në protestë”, u shpreh Nadia.
Ndërsa në anën tjetër sipas projektligjit për të cilin vazhdojnë diskutimet në parlament, forcat e sigurisë kundër terrorizmit krahas filmimeve me kamera mund të përdorin edhe kamerat “dronë” në betejat dhe operacionet brenda qytetit.
Në Francë, në demonstratat e “jelekëve të verdhë” dhe protestat kundër reformës së pensioneve, dhuna e përdorur nga policia kundër protestuesve u filmua dhe u shpërnda në mediat sociale, pas së cilës u hapën hetime ndaj pjesëtarëve të policisë.(AA)
