Të paktën 7 emigrantë janë shpallur të zhdukur dhe dyshohet të kenë humbur jetën pas përmbysjes së një varke me emigrantë në lumin Drina të Serbisë.
Sipas të dhënave paraprake, emigrantët e paligjshëm po tentonin të kalonin në mënyrë ilegale nga Serbia në Bosnje e Hercegovinë.
Dëshmitë nga vendngjarja bëjnë me dije se në momentin e përmbysjes së varkë, brenda saj ndodheshin 25 persona, teksa vetëm 18 prej tyre kanë arritur në breg, mes të cilëve dhe 3 fëmijë.
Një operacion kërkim shpëtimi ka shkuar në zonë dhe po kërkon në rrjedhën e lumit për emigrantët e zhdukur.
“Mëngjesin e sotëm, rreth orës 05:00, policia kufitare në Llubovi u informua nga autoritetet kufitare të Bosnje e Hercegovinës, por edhe nga qytetarët, se gjatë natës një anije me emigrantë është fundosur në Drina. Ata po tentonin ta kalonin lumin nga Serbia nga qyteza Dërllaça”, tha ministri Daçiq në lidhje me këtë ngjarje.a2cnn.
