Trajneri i Kombëtares së Italisë, Gennaro Gattuso, ka dhënë dorëheqje nga posti i përzgjedhësit pas eliminimit nga kualifikimet për Botëror, ku Italia është mposhtur nga Bosnë – Hercegovina pas penalltive.
Paraprakisht janë larguar edhe presidenti i federatës Gabriele Gravina dhe legjenda Gianluigi Buffon i cili ksihte një rol në ekipin kombëtar.
“Fanella e Italisë është më e çmuara në futboll dhe mendoj se është e drejtë të hapet rruga për vendime të reja teknike” ka thënë Gattuso, duke shtuar se ishte nder ta drejtonte ekipin.
Edhe Federata Italiane e Futbollit e ka konfirmuar ndarjen me marrëveshje të dyanshme, duke falënderuar trajnerin dhe stafin e tij për profesionalizmin dhe përkushtimin gjatë nëntë muajve të fundit.
Federata italiane pritet të zgjedhë trajnerin e ri pas 22 qershorit, kur të emërohet edhe presidenti i ri. Ndër emrat më të përfolur për pankinën e Italisë janë Massimiliano Allegri dhe Antonio Conte, të cilët shihen si figura me autoritet për të rikthyer stabilitetin.
Ndërkohë, si zgjidhje e përkohshme po përmendet edhe Silvio Baldini, aktualisht trajner i ekipit U-21, i cili mund të drejtojë ekipin në ndeshjet miqësore të verës.
