Mbi 7.000 njerëz të zhvendosur, pacientë dhe personel mjekësor në Spitalin Al-Shifa po “luftojnë vdekjen për shkak të mungesës së ujit dhe ushqimit” të shkaktuar nga bllokada ushtarake izraelite, tha sot zyra mediale e qeverisë në Gaza, transmeton Anadolu.
Sipas një deklarate të lëshuar në Telegram, zyra theksoi situatën kritike, duke thënë se “nuk ka ushqim, ujë apo qumësht për foshnjat në Spitalin Al-Shifa”.
“Ne mund të humbasim një numër fëmijësh të kequshqyer në spital për shkak të ndërprerjes së energjisë elektrike, duke i lënë ata pa inkubatorë”, thuhet në deklaratë.
Zyra mediale theksoi “kushtet e rënda në Spitalin Al-Shifa, i cili strehon 650 pacientë dhe afërsisht 7.000 individë të zhvendosur. Ekipet mjekësore, pacientët dhe individët e zhvendosur po luftojnë për mbijetesë për shkak të mungesës së gjërave thelbësore të jetës”.
Në deklaratë theksohet se “forcat izraelite kanë shkatërruar të gjitha automjetet në kompleksin e spitalit dhe refuzojnë të lejojnë personelin mjekësor ose pacientët të largohen”.
Zyra “apeloi për ndërhyrje urgjente ndërkombëtare për të shpëtuar të pranishmit në kompleks”.
Ajo raportoi se “ushtria izraelite kreu operacione kërkimi dhe inspektimi brenda Spitalit Al-Shifa, duke transferuar trupat e martirëve në një vend të panjohur. Forcat okupuese e kanë shndërruar objektin në një kazermë ushtarake”.
Deklarata bëri thirrje për “presion ndërkombëtar për të çliruar kompleksin Al-Shifa nga ushtria izraelite, për të hequr ushtarët dhe tanket e saj dhe për të hedhur poshtë narrativën izraelite të armëve të pranishme në spital, duke e përshkruar atë si të rreme”.
“Al-Shifa dhe spitalet në Gaza janë institucione humanitare dhe nuk do të lejojnë që ato të përdoren si skenë për operacione ushtarake”, thuhet në deklaratë.
Sot në mbrëmje, ushtria izraelite rrethoi Spitalin Baptist Al-Ahli, institucioni i fundit shëndetësor që funksionon në Gaza, tha Shoqëria e Gjysmëhënës së Kuqe Palestineze.
Për ditë të tëra, sulmet dhe bllokada izraelite kanë shënjestruar të gjitha spitalet në veri të Rripit të Gazës, duke u arsyetuar me “prezencën e selisë së militantëve”, një pretendim që Hamasi dhe zyrtarët palestinezë në Gaza e kanë mohuar vazhdimisht.
