Nënkryetari i Kuvendit të Shqipërisë, Agron Gjekmarkaj, po zhvillon një vizitë zyrtare dyditore në Republikën e Kroacisë, ku gjatë ditës së parë ka zhvilluar takime me personalitete të rëndësishme të jetës politike dhe institucionale kroate.
Një nga takimet kryesore të kësaj vizite ishte ai me znj. Kristina Ikić Baniček, Kryetare e Komisionit për Bashkëpunim Ndërparlamentar të Parlamentit të Kroacisë. Gjatë takimit u diskutua mbi marrëdhëniet parlamentare shqiptaro-kroate, mbështetjen e Kroacisë për Shqipërinë në procesin e integrimit evropian dhe çështje me interes për shqiptarët në rajon.
Gjatë takimit, Gjekmarkaj përcolli përshëndetjet e liderit të opozitës, Prof. Dr. Sali Berisha, i cili e vlerëson veçanërisht kontributin dhe mbështetjen që znj. Baniček, së bashku me kolegë të tjerë parlamentarë kroatë, i ka dhënë Kosovës në rrugën e saj drejt përfshirjes në Këshillin e Evropës.
Nënkryetari i Kuvendit shprehu gjithashtu mirënjohjen për mbështetjen e vazhdueshme të Kroacisë ndaj Kosovës dhe shqiptarëve, si dhe për qëndrimet e saj në mbështetje të integrimit evropian të Shqipërisë. Në këtë kuadër, u vlerësua rëndësia e përvojës kroate për Shqipërinë në procesin e anëtarësimit në Bashkimin Evropian.
Në bisedë, Gjekmarkaj ngriti edhe shqetësimet për zhvillimet politike dhe institucionale në Shqipëri, veçanërisht për standardet e procesit zgjedhor, luftën kundër korrupsionit, nevojën për një drejtësi të pavarur dhe funksionale, si dhe për përfshirjen e opozitës në reformat themelore që prekin të ardhmen e vendit, përfshirë reformën territoriale dhe procesin e integrimit evropian. Sipas tij, procesi i integrimit evropian duhet të jetë një proces i bazuar në meritë dhe në përmbushjen e standardeve.
Përmes këshilltarit të Presidentit të Kroacisë për Politikën e Jashtme dhe Evropiane, ambasadorit Neven Pelicarić, Gjekmarkaj përcolli gjithashtu përshëndetjet e Prof. Dr. Sali Berishës për Presidentin e Republikës së Kroacisë, Zoran Milanović.
“Komuniteti shqiptar në Kroaci u vlerësua si një faktor i rëndësishëm miqësie dhe një urë lidhëse mes dy vendeve dhe dy popujve. Integrimi i tij në shoqërinë kroate dhe kontributi i tij në jetën publike, ekonomike e kulturore përbëjnë një pasuri të përbashkët për marrëdhëniet shqiptaro-kroate”, shkruan Gjekmarkaj.
Dita e parë e vizitës konfirmoi edhe një herë marrëdhëniet e mira dhe miqësore mes Shqipërisë dhe Kroacisë, si dhe rëndësinë e diplomacisë parlamentare në forcimin e tyre.
Nënkryetari i Kuvendit të Shqipërisë, Agron Gjekmarkaj ndodhet në Kroaci në kuadër të një vizite zyrtare dyditore, gjatë së cilës pritet të zhvillojë edhe takime të tjera me përfaqësues të politikës dhe institucioneve kroate.
