Aleanca për Ardhmërinë e Kosovës nuk do të marrë pjesë në seancën e radhës së Kuvendit, ka bërë të ditur kryetari i saj, Ardian Gjini, pas takimit të partisë.
Gjini tha se Aleanca kishte qenë e gatshme të merrte pjesë në seancë nëse ajo do të thirrej deri të shtunën, kur, sipas tij, kishte skaduar edhe afati i dytë 15-ditor.
“Kur e kemi kuptuar që nuk është thirrur as të shtunën, ne mendojmë që duhet me e dhënë një mesazh, duhet me treguar që nuk pranojmë me u fyer kështu si institucion”, tha Gjini.
Ai deklaroi se, sipas tij, me këtë situatë po “fyhet Kuvendi, po fyen deputeti, po fyet Kosova, po fyen qytetarët e Kosovës”.
Gjini tha se pas kësaj situate duhet bërë një referim në Gjykatën Kushtetuese, për të cilin, sipas tij, duhet të dakordohen edhe dy partitë e tjera opozitare.
“Ajo që e pret Kosovën është patjetër një referim në Gjykatën Kushtetuese, të cilën duhet me e dakorduar me dy partitë e tjera”, tha Gjini.
Ai shtoi se, sipas tij, “nuk kemi rrugë tjetër sot përpos kësaj pune”.
