Deputeti i Lëvizjes Vetëvendosje, Ardian Gola tha se Universiteti i Prishtinës është dukshëm më shumë sesa universitet.
Gola tha se Universiteti i Prishtinës është boshti kurrizor e identitar i shqiptarëve të Kosovës.
“Universiteti i Prishtinës ka një mori specifikash, të cilat e bëjnë të veçantë në tregun e arsimit të lartë. Universiteti i Prishtinës është dukshëm më shumë sesa universitet, është historia kulturore, identitare e politike e këtij vendi është boshti kurrizor, boshti identitar i shqiptarëve të Kosovës dhe duhet të trajtohet në një ndjeshmëri më specifike. Fatkeqësisht trajtimi i tij në diskursin publik është jo proporcional edhe me raport me kolegjet private dhe universitetet tjera publike në Kosovë”, vlerësoi Gola në emisionin “Info Nata” në Tëvë1.
Më tej ai tha se UP-ja është një lloj kurbani, i cili paguan fatura për shumë probleme të arsimit të lartë.
“Disi më është krijuar përshtypja që Universiteti i Prishtinës është një lloj kurbani, i cili sakrifikohet për cilësinë e arsimit të arsimit lartë. Do të thotë paguan fatura për shumë probleme të arsimit të lartë”, u shpreh ai.
“Unë shoh nganjëherë banalitete televizive dhe publike ku Universiteti i Prishtinës përkatësisht logoja e tij, shoqërohet në një reportazh televiziv ku tematizohet çështja e ftesave publike për me hartu tema të diplomës. Dhe ja se çka po bëjnë studentët e Prishtinës, ku po i bëjnë temat e diplomës. Ai nuk është problem i Universitetit të Prishtinës. Ai është problem total i tregut dhe sistemit në të cilin ne po jetojmë”, theksoi profesori Gola.
Ai gjithashtu tha se ka një diskurs kriminalizues në raport me UP-në.
“Ka një diskurs kriminalizues, madje në raport me Universitetin e Prishtinës. Shumë nganjëherë disa statistike paushall të cilat në aspektin metodologjik lënë shumë për të dëshiruar që e kanë quajtur Universitetin e Prishtinës, universitet që deri në 70 për qind të profesorëve atje nuk e kanë plotësua kushtin për me pas thirrjet e tyre. Madje. Fatkeqësisht ka pas profesorë të cilët i janë referu atyre raporteve se gjoja Universiteti i Prishtinës 70 për qind nuk i ka plotësuar kushtet për me bart titullin që e ka. D.m.th ai profesor bëhet pjesë e një mashtrimi sistemik të të rinjve”, shtoi Gola.
