Aktivistja e famshme e të drejtave të njeriut, Greta Thunberg, do t’i bashkohet protestës së nesërme në Tiranë, në mbështetje të palestinezëve në sheshin “Skenderbej”.
Organizatorët e protestës, Lëvizja për të drejtat e njeriut dhe paqe ndërkombëtare “Solidarity Albania”, kanë publikuar një video të Thunbergut teksa bën thirrje për bashkim në këtë iniciativë.
“Urgjent. Ndaloni urinë. Lejoni ushqimin, lejoni jetën. Protesto me Greta Thunbergun”, thuhet në postimin në Instagram.
Protesta pritet të organizohet duke filluar nga ora 18:00.
“Gaza ka hyrë në fazën 5 të kequshqyerjes dhe palestinezët po shfrytëzojnë atë pak energji që u ka mbetur për të nxitur botën të ngrihet në këmbë dhe të zgjedhë një anë. Nesër, ne do të ngrihemi së bashku për të kërkuar fundin e okupimit të jashtëligjshëm të Izraelit”, ka thënë Thunberg.
Tashmë është i njohur rasti kur Thunberg u ndalua në anijen humanitare të nisur për në Gaza, bashkë me dhjetëra aktivistë të tjerë. Aktivistët u ndaluan nga autoritetet e Izraelit në qershor, teksa rasti shkaktoi bujë në opinionin publik.
