Kandidati për kryeministër nga Partia Demokratike e Kosovës, Bedri Hamza, në kuadër të fushatës elektorale ka zhvilluar takim me përfaqësues të sektorit të arsimit. Hamza tha se, arsimi është fuqia më e madhe e një kombi. Ai ka premtuar rritje pagash e përmirësim kushtesh në arsim.
“Jam këtu për të dhënë zotime konkrete, për t’iu siguruar se bashkë mundemi më mirë. Rritja e pagave për mësues, profesorë e gjithë punëtorët e arsimit do të ndodhë. Përkushtimi juaj duhet të shpërblehet me paga dinjitoze. Qysh në vitin e parë të qeverisjes sime, do të rrisim pagat në sektorin publik për 50 për qind për të siguruar që ju të punoni me dinjitet e motivim. Ju garantoj, që përtej premtimit elektoral është zotim që do të ndodhë. Po ashtu, do të ketë më pak burokraci e më shumë autonomi për mësimdhënësit”, tha para tyre Hamza.
Ai para të pranishmëve nga sektori i arsimit tha se do ta reduktojnë barrën burokratike, do të reformojnë sistemin e vlerësimit e inspektimit, e do të vendosin një sistem transparent në vlerësimin e punës së mësimdhënësve.
“Do të ketë teknologji moderne në shkolla e universitete. Çdo cent që jepet për arsimin nuk është shpenzim, por investimi më i duhur në shoqërinë tonë. Tabelat digjitale, platforma digjitale të mësimdhënies e laboratorë modern do të bëhen pjesë në çdo shkollë. Do të ketë bursa e mbështetje financiare për studentët e askush nuk do të ngelet pa i realizuar ëndrrat për t’u shkolluar”, tha ai.
Hamza, ka përsëritur premtimin për rritje pensionesh, për më shumë çerdhe e subvensione për fëmijë e për investime në shëndetësi. Të gjitha këto, sipas tij, nuk janë veç ide të shkuara të një programi zgjedhor, por plane të detajuara e të realizueshme.
Ndërkaq, kandidati për deputet nga kjo parti, Enver Hoxhaj, tha se PDK-ja është parti e vendimeve të mëdha, derisa, sipas tij, Hamza është shpresa, besimi dhe optimizmi për çdo mësimdhënës.
