Kryetarja e Kuvendit dhe njëherësh ushtruesja e detyrës së presidentes së Kosovës, Albulena Haxhiu ka reaguar pas ndarjes nga jeta të akademikut Rexhep Qosja, duke e cilësuar humbjen e tij si një goditje të madhe për botën shqiptare.
Ajo u shpreh se Kosova ka humbur një nga personalitetet më të rëndësishme të mendimit kritik, letërsisë dhe studimit, i cili për dekada me radhë ishte i pranishëm në jetën kulturore, akademike dhe politike.
“Humbëm një personalitet që për më shumë se gjysmë shekulli ishte i pranishëm me libra, studime, debat dhe qëndrim,” theksoi Haxhiu.
Sipas saj, te Qosja bashkëjetonin studiuesi i letërsisë, kritiku, romancieri, eseisti, profesori dhe polemisti publik, duke lënë gjurmë të pashlyeshme në kulturën shqiptare.
Duke veçuar kontributin e tij në letërsi, Haxhiu përmendi romanin Vdekja më vjen prej syve të tillë si një vepër që zgjeroi kufijtë e romanit shqiptar, ndërsa librin Të fshehtat e treguara si dëshmi të mprehtësisë së tij deri në fund të krijimtarisë.
Ajo shtoi se për shumë breza studentësh dhe lexuesish, Qosja ishte “shkollë më vete”, duke ndihmuar në kuptimin e letërsisë si pasqyrim i shoqërisë dhe i identitetit.
Haxhiu vuri në dukje edhe simbolikën e ndarjes së tij nga jeta në Dita Ndërkombëtare e Librit, duke theksuar se krijuesit nderohen më së shumti përmes veprës që lënë pas.
“Hero i mendjes, ai do të mbetet udhërrëfyes për brezat,” përfundoi ajo, duke u shprehur ngushëllime familjes, miqve dhe lexuesve të shumtë.
