Ushtruesja e detyrës së Presidentes së Kosovës, Albulena Haxhiu, pas vizitës në Klinikën e Onkologjisë, ku mori pjesë në aktivitetet e muajit të ndërgjegjësimit për kancerin e gjirit, ka folur për zhvillimet politike në vend dhe çështjen e zgjedhjes së presidentit të ri.
Haxhiu ka thënë se është e rëndësishme që partitë politike të zhvillojnë takime dhe të arrijnë një konsensus për zgjedhjen e presidentit, duke theksuar se, sipas saj, nuk ka kuptim që vendi të shkojë në zgjedhje të reja.
“Është shumë e rëndësishme që të kemi takime të cilat na çojnë në një konsensus për gjetjen e presidentit. Në rrethanat në të cilat jemi, është prioritet që të dëshmojmë vullnet dhe jo, në anën tjetër, vullnet të mungesës apo tendencë për ta çuar vendin në zgjedhje të reja. Nuk ka asnjë kuptim që me një vendim ta çojmë vendin në zgjedhje, jo vetëm për shkak të reformave të brendshme, por edhe për shkak të vendimit të 16 shtatorit. Nuk ka as edhe një kuptim ta çojmë vendin në zgjedhje në këtë moment. Takimet do të zhvillohen shumë shpejt. Ne kemi shumë pak kohë deri më 6 tetor dhe është shumë e rëndësishme që të zhvillohen takimet, në mënyrë që nga këto takime të dalim me një konsensus për presidentin”, ka thënë Haxhiu.
E pyetur për mandatin e saj si ushtruese e detyrës së Presidentes dhe interpretimet lidhur me afatin kushtetues, Haxhiu ka thënë se pret që Gjykata Kushtetuese të japë një qëndrim edhe për këtë çështje.
“Sa i përket mandatit tim, Kushtetuta nuk flet për këtë temë, por flet se ushtruesja e detyrës së Presidentes nuk mund të qëndrojë më shumë se gjashtë muaj. Ka pasur interpretime të ndryshme. Megjithatë, unë kam pritur nga Gjykata Kushtetuese, meqë e ka marrë rolin e interpretueses së Kushtetutës, që të flasë edhe në këtë aspekt. Mirëpo, nuk ka pasur. Kam menduar t’i drejtohem edhe Gjykatës Kushtetuese për këtë çështje, mirëpo nuk kam vendosur deri tani dhe ende po pres që të marr një konfirmim”, është shprehur Haxhiu.
Haxhiu është pyetur edhe nëse pritet që Kuvendi i Kosovës të mblidhet së shpejti për të shqyrtuar çështjet që lidhen me punën e tij.
Ajo ka thënë se një seancë do të thirret së shpejti dhe se pritet të sigurohen nënshkrimet e nevojshme për shqyrtimin e projektligjeve.
“Siç e dini, shumë prej marrëveshjeve që lidhen me planin e marrëveshjes, me këtë qëllim dhe të tjera, janë proceduar nga Qeveria e Kosovës. Natyrisht se do të ketë seancë të Kuvendit, do të ftohet shumë shpejt. Presim që të kemi 40 nënshkrime dhe presim që të kemi diskutime për projektligjet dhe t’i diskutojmë në seancë të gjitha këto. Jemi në ankth për shkak të situatës në të cilën jemi, prandaj duhet të veprojmë me shpejtësi”, ka deklaruar Haxhiu.
Haxhiu është pyetur edhe për qëndrimet e Partisë Demokratike të Kosovës lidhur me ndryshimin e Ligjit për Dhomat e Specializuara të Kosovës.
Ajo ka thënë se, sipas saj, qëndrimet e PDK-së për këtë çështje kanë ndryshuar dhe se nuk është për të bërë “pazare” lidhur me ndryshimin e ligjit.
“Unë kam përcjellë qëndrimet e PDK-së. Ndryshojnë ditë pas dite, përfaqësuesi nga përfaqësuesi. Nuk ka një qëndrim të tyre. Unë nuk jam që të bëhen pazare për këtë çështje. Sa i përket deklaratës së Hamzës, po e marr si të mirëqenë. Unë nuk jam që të bëhen pazare për këtë çështje. Duhet të ulemi të gjithë dhe të kemi prioritetet që i kemi. Për mua, më e rëndësishme është që ta zgjedhim presidentin sesa ta votojmë ligjin, sepse nëse zgjedhim presidentin, do të kemi mundësi ta votojmë dhe ta adresojmë edhe ligjin”, ka thënë Haxhiu.
