Kryeministri i Kosovës, Albin Kurti, ka vizituar Ambasadën e Türkiye-s në Prishtinë ku u ka shprehur ngushëllime zyrtarëve të ambasadës dhe është nënshkruar në librin e zisë, transmeton Kosova Post.
Pas shkrimit të tij në libër, Kurti tha se ne “ndajmë dhimbjen dhe pikëllimin me popullin mik turk dhe gjithashtu u shprehim ngushëllime familjarëve të viktimave të cilat po shtohen për nga numri nga ora në orë këto ditë”.
“Ne njëkohësisht shprehim edhe solidaritetin tonë dhe mbështetjen me kapacitetet që kemi për të gjetur sa më shumë të gjallë nën rrënoja, për çfarë edhe lutemi që të ketë sa më shumë të gjallë. 36 pjesëtarë të Forcës së Sigurisë së Kosovës dhe njësiti K-9 me tre qenë dje kanë shpëtuar një vajzë dyvjeçare me nënën e saj dhe operacioni i shpëtimit po vazhdon”, tha Kurti për Anadolu.
Kryeministri Kurti përgëzoi dhe falënderoi pjesëtarët e FSK-së dhe të gjithë të angazhuarit në Türkiye, të cilët siç u shpreh ai, po punojnë në kushte shumë të rrezikshme në mënyrë që të shpëtojnë jetëra njerëzish.
Kryeministri i Kosovës gjithashtu uroi shërim sa më të shpejtë për të lënduarit e tërmetit.
Tërmetet me magnitudë 7,7 dhe 7,6, me epiqendër në provincën Kahramanmaraş, goditën dhjetë provinca dhe prekën më shumë se 13 milionë njerëz.
