Lista Serbe ka njoftuar sot se nuk do të marrë pjesë në zgjedhjet e jashtëzakonshme në komunat në veri të Kosovës, të cilat do të mbahen në muajin prill.
Sipas njoftimit thuhet se ky vendim ka ardhur pasi sipas tyre, nuk janë plotësuar kërkesat që kanë bërë që ata të largohen nga institucionet e Kosovës.
Teksa sipas tyre, Komisioni Qendror i Zgjedhjeve po synon që të organizojë zgjedhje të njëanshme pa respektuar interesat e popullit serb.
“Shfrytëzojmë rastin t’i informojmë qytetarët tanë se partia jonë politike nuk do të marrë pjesë në zgjedhje sepse nuk janë plotësuar kërkesat që na bënë të largohemi nga institucionet e Kosovës dhe as nuk do të marrim pjesë në ndonjë zgjedhje deri në përmbushjen e kërkesave tona legjitime. Kjo e bën më se të qartë se Kosova dhe Komisioni Qendror i Zgjedhjeve po përpiqen që në mënyrë të njëanshme të organizojnë zgjedhje në veri të Kosovës, pa respektuar interesat legjitime të popullit serb, kundër vullnetit të qytetarëve”, thuhet në njoftim.
