Instituti Kombëtar i Shëndetësisë Publike të Kosovës ka njoftuar se nga data 16 prill deri më 25 maj 2026, në Kosovë janë konfirmuar 20 raste të fruthit. Gjatë javës së kaluar janë raportuar edhe 2 raste të reja të kësaj sëmundjeje.
Sipas të dhënave të institutit, rastet janë shpërndarë në disa komuna të vendit: Ferizaj (7 raste), Prishtinë (4 raste), Kaçanik (4 raste), si dhe nga një rast në Lipjan, Fushë Kosovë, Gjilan, Shtime dhe Obiliq.
IKShPK bën të ditur se të gjitha rastet e konfirmuara janë persona të pavaksinuar me vaksinën MMR dhe të njëjtit kanë kërkuar trajtim spitalor.
Instituti u bën thirrje qytetarëve që çdo person me simptoma të dyshimta të fruthit, si temperaturë e lartë, skuqje apo ndryshime në lëkurë, kollë dhe rrufë, të paraqitet menjëherë në institucionet shëndetësore.
Duke pasur parasysh natyrën shumë ngjitëse të fruthit dhe rrezikun e përhapjes së mëtejshme, IKShPK apelon te prindërit që të kontrollojnë statusin e vaksinimit të fëmijëve dhe të sigurojnë vaksinimin e tyre në qendrat e mjekësisë familjare.
Instituti thekson se vaksinimi mbetet masa më efektive dhe më e sigurt për parandalimin e fruthit dhe mbrojtjen e shëndetit publik.
