Botërori 2026 pritet të jetë një nga ngjarjet më të mëdha sportive në histori.
Presidenti i FIFA-s, Gianni Infantino, ka deklaruar se turneu që do të organizohet në Shtetet e Bashkuara të Amerikës, Kanada dhe Meksikë do të shënojë një kapitull të ri për futbollin botëror.
Në një intervistë për “AS”, Infantino theksoi se edicioni i ardhshëm i Kupës së Botës do të jetë i pari me 48 përfaqësuese, 104 ndeshje dhe 16 qytete organizatore në tre shtete pritëse.
“Do të jetë diçka e jashtëzakonshme. Nuk është vetëm një turne sportiv, por një ngjarje globale që bashkon njerëzit. Bota do të ndalet për ta ndjekur”, ka deklaruar Infantino.
Sipas tij, interesimi për biletat ka qenë i paparë deri më tani. Brenda vetëm katër javësh janë regjistruar mbi 500 milionë kërkesa për bileta, ndërsa në dispozicion do të jenë rreth shtatë milionë.
“Është një shifër e jashtëzakonshme, që nuk është parë më parë në historinë e FIFA-s apo të ndonjë organizate tjetër. Presim që stadiumet të jenë të mbushura dhe atmosfera të jetë festive gjatë gjithë turneut”, shtoi ai.
Infantino u ndal edhe te Kupa e Botës për Klube, duke e cilësuar si një projekt të suksesshëm.
Ai konfirmoi se FIFA është duke diskutuar për zhvillimin e mëtejshëm të kësaj garë, ku një nga idetë është zgjerimi i tij me 32 skuadra ose edhe më shumë.
Megjithatë, vendimi përfundimtar për formatin dhe vendin organizator pritet të merret pas përfundimit të Botërorit 2026.
