Irani ka nisur ceremonitë shumëditore të varrimit të ish-udhëheqësit suprem, Ajatollah Ali Hamenei, i vrarë në sulmet e përbashkëta amerikano-izraelite në fund të muajit shkurt.
Mijëra qytetarë të veshur me rroba të zeza janë mbledhur para Xhamisë së Madhe Mosalla në Teheran për t’i bërë nderimet e fundit ish-udhëheqësit suprem të Iranit, Ajatollah Ali Khamenei, në ditën e parë të ceremonive mortore.
Trupi i Khameneit është vendosur për homazhe në kompleksin Grand Mosalla dhe do të qëndrojë aty për tre ditë, përpara se të nisë një procesion funeral në disa qytete të Iranit dhe Irakut.
Varrimi përfundimtar është planifikuar të mbahet të enjten në qytetin e tij të lindjes, Mashhad, pranë Faltores së Imam Rezas, një nga vendet më të shenjta të islamit shiit.
Autoritetet iraniane presin që gjatë ceremonive, të cilat do të zgjasin gjashtë ditë, të marrin pjesë mes 15 dhe 20 milionë njerëz. Më pas, aktivitetet përkujtimore do të vazhdojnë edhe për 40 ditë të tjera në mbarë vendin.
Në ceremoninë e së shtunës, mbështetës të regjimit brohoritën slogane kundër Shteteve të Bashkuara dhe kërkuan hakmarrje për vrasjen e Khameneit. Disa pjesëmarrës deklaruan se ai “u sakrifikua për popullin” dhe se Irani nuk do të harrojë kurrë sulmin që i mori jetën.
Ajatollah Ali Khamenei u vra në fund të shkurtit gjatë sulmeve të përbashkëta të Izraelit dhe Shteteve të Bashkuara ndaj Iranit, të cilat çuan në përshkallëzimin e konfliktit në Lindjen e Mesme.
Ndërkohë, presidenti amerikan Donald Trump deklaroi se Uashingtoni i ka dhënë Iranit kohë për zhvillimin e ceremonive mortore, ndërsa negociatat për marrëveshjen e paqes do të vazhdojnë pas përfundimit të tyre.
Gjatë ditëve në vijim, trupi i Khameneit do të transportohet fillimisht në qytetin e shenjtë të Qomit, më pas në Najaf dhe Karbala të Irakut, përpara se të rikthehet në Mashhad për ceremoninë e varrimit.
Pas vdekjes së tij, posti i udhëheqësit suprem është marrë nga djali i tij, Mojtaba Khamenei.
Megjithatë, ai nuk është shfaqur ende në publik që nga marrja e detyrës, duke nxitur spekulime mbi gjendjen e tij dhe duke shtuar interesin nëse do të marrë pjesë në ceremonitë mortore./rtk
