Ish- kryenegociatorja e Kosovës në dialogun me Serbinë, Edita Tahiri, ka thënë se është koha që SHBA dhe BE ta realizojnë marrëveshjen finale mes Kosovës dhe Serbisë.
Tahiri thotë se Kosova duhet të zbatojë Asociacionin, e në anën tjetër Serbia ta njohë de jure shtetin e Kosovës.
Sipas saj, një marrëveshje e tille do te garantohej nga SHBA, BE dhe NATO.
“Është koha që SHBA dhe BE ta realizojnë marrëveshjen finale mes Kosovës dhe Serbisë përmes arbitrazhit me një marrëveshje që përfshinë obligimet e detyrueshme të dy palëve: me një anë Kosova zbaton Asociacionin, e në anën tjetër Serbia njeh de jure shtetin e Kosovës. Kjo marrëveshje do të precizoj që në datën e hyrjes së Serbisë në BE, në po atë datë Serbia ka njohur zyrtarisht Kosovën dhe Kosova ka zbatuar Asociacionin.Një marrëveshje e tillë do të garantohej nga SHBA, BE dhe NATO. Ekzistojnë modele të tilla në historinë e marrëveshjeve paqësore mes shteteve që kanë pasur mosmarrëveshje – është koha që të bëhet një marrëveshje e tillë historike, në menyrë që më në fund Ballkani Perendimor të arrinë një paqe të qëndrueshme”, shprehet Tahiri.
