Ish-ushtari i Ushtrisë Çlirimtare të Kosovës nga Mallakastra, Meçan Zotaj, thotë se krijimi i Gjykatës Speciale është një padrejtësi e bërë ndaj Kosovës.
Madje, Zotaj deklaroi që luftën me pushkë ndaj Serbisë e kemi fituar historikisht, mirëpo atë me laps shpesh herë e kemi humbur.
“E them me mburrje që vepra më madhështore që kam bërë në jetën time deri sot është kyçja në Ushtrinë Çlirimtare të Kosovës. Çdo ushtar i UÇK-së, krijimin e Gjykatës Speciale e shikon si një padrejtësi që i është bërë popullit të Kosovës, por edhe eprorëve të UÇK-së. Historikisht luftën me pushkë e kemi fituar, kurse me laps kemi çaluar, ose shpesh herë edhe kemi humbur”, tha kështu në emisionin “Info Nata” në Tëvë1.
Zotaj thotë se disa shqiptarë që kanë qenë bashkëpunëtorë të Serbisë, kanë imponuar politikën e Kosovës për ta bërë themelimin e Gjykatës Speciale, raporton teve1.info.
“Ka shumë shkaktarë të cilët Gjykatën Speciale si një zjarr i mbjellur nga fabrikimet e Serbisë në shtetin e Kosovës, fatkeqësisht të ushqyer e duke hedhur benzinë disa shqiptarë që nuk kanë qenë të gatshëm për të kapur pushkën e për të çliruar Kosovën. Por përkundrazi, kanë qenë edhe bashkëpunëtorë të shtetit të Jugosllavisë, kryesisht Serbisë. Ata kanë imponuar politikën e Kosovës që të krijojë dhe të pranojë një Gjykatë selektive, është gabim pranimi dhe votimi i saj në Kuvend, sepse gjykatësi kur po thirret në akuzën e eprorëve tanë, po thirret në emër të popullit të Kosovës”, u shpreh tutje Zotaj.
