Disa nga ngjarjet, njerëzit dhe datat më me ndikim në historinë botërore që kanë shënuar ditën e sotme, 25 shkurt, shkruan Kosova Post.
Çfarë ka ndodhur më 25 shkurt?
Muhammed Ali Clay mundi Sonny Liston dhe u shpall kampion i peshave të rënda në boks. Muhammed Ali para se të bëhej mysliman ka pasur emrin Cassius Marcellus Clay… Boksieri me origjinë afroamerikane, Muhammed Ali u njoh me boksin kur ishte vetëm 12 vjeç. Pas një kohe të shkurtër ai filloi të përmendet me sukseset në boks. Nga Olimpiada e Romës, ku mori pjesë në moshën 18-vjeçare, u kthye me medaljen e arit. Në vitin 1964, pasi u shpall kampion bote për peshat e rënda, ndërroi fe dhe u bë mysliman. Ai mbeti gjithmonë në rendin e ditës jo vetëm me identitetin e sportistit, por edhe me karakterin dhe sjelljet e tij. Ai nuk shkoi në Luftën e Vietnamit duke thënë: “Vietnamezët nuk më kanë bërë asgjë të keqe që unë të luftoj me ta”. Për këtë arsye ai u dënua me 5 vjet heqje lirie dhe gjobë 10 mijë dollarë. Dy ditë pasi ishte kthyer nga Olimpiada e Romës, kur mësoi se në një restorant shërbehej vetëm për të bardhët, e hodhi medaljen e arit në lumin Ohio. Për disa shkaqe, Muhamet Ali, që u detyrua të qëndrojë disa herë larg ringut, gjatë gjithë karrierës së tij të boksit humbi vetëm 5 ndeshje.
25 shkurt 1994… Në qytetin Hebron (El Halil) të Bregut Perëndimor në Palestinë, si pasojë e hapjes së zjarrit nga një hebre i quajtur, Baruch Goldstein, u vranë 29 palestinezë dhe u plagosën 125 të tjerë. Kjo masakër u shënua në histori si “Masakra në Xhaminë Ibrahim”. Goldstein u linçua nga turma e zemëruar. Në kryengritjet që ndodhën më pas u vranë 25 palestinezë dhe 9 izraelitë.
25 shkurt 1994… Humbi jetën një nga biznesmenët më të mëdhenj të Turqisë, Vehbi Koç si pasojë e një infarkti që i ra teksa ishte në qytetin Antalya. I lindur në vitin 1901, ai e filloi tregtinë kur ishte vetëm 16 vjeç, duke shitur në dyqanin që i kishte hapur i ati produkte të tilla si: llastiqe për këpucë, sheqer, djathë kaçkavall, ullinj e makarona. Në vitin 1926 regjistroi biznesin e tij dhe në po të njëjtin vit lidhi edhe kontratën e parë ndërkombëtare. Duke bërë vazhdimisht marrëveshje në fusha të reja sipas nevojave të Turqisë në zhvillim, arriti që nga ai dyqani i vogël të ngrejë një prej “holdingeve” më të mëdha të Turqisë. Në vitin 1984 ai u tërhequr nga biznesi dhe iu përkushtua projekteve sociale. Në vitin 1987 ai u zgjodh “Biznesmeni i Vitit” nga Dhoma Ndërkombëtare e Tregtisë dhe e mori çmimin në Nju-Delhi nga kryeministri i atëhershëm i Indisë, Rajiv Gandhi. Në vitin 1994, nga ana e Sekretarit të Përgjithshëm të atëhershëm të Kombeve të Bashkuara, Boutros Boutros-Ghali, për kontributin e dhënë, atij iu dha “Çmimi Botëror për Planifikimin e Familjes”. Vehbi Koç ka shkruar edhe dy libra: “Historia e jetës time” dhe “Kujtimet, mendimet dhe këshillat e mia”.
25 shkurt 2000… Kitaristi dhe autori meksikan, Carlos Santana, fitoi 8 çmime “Grammy” përnjëherësh duke barazuar kështu edhe rekordin e thyer më parë nga Michael Jackson me albumin “Thriller” për marrjen e më shumë çmimeve “Grammy” njëherësh.