Kombëtarja shqiptare e futbollit të enjten mbrëma arriti fitore me “aromë” Evropiani kundër Çekisë.
Kuqezinjtë triumfuan 3:0 kundër Republikës Çeke në stadiumin “Air Albania” në Tiranë.
Kapiteni i Republikës Çeke, Tomas Soucek pas ndeshjes tha se kartoni i kuq ndikoi në humbjen e takimit.
“Të gjithëve na vjen keq si doli. Në fakt, ne morëm një gol nga gjuajtja e parë në portë, më pas ishte e vështirë të kthenim ndeshjen. Përveç kësaj, kur u gëzuam për golin, në fund, në vend që të barazojmë, përfunduam në dhjetë lojtarë. Kartoni i kuq e vrau ndeshjen për ne. Në pjesën e dytë lamë gjithçka aty, por sërish ata shënuan dy gola” – tha Soucek, njofton sport.cz, përcjell lajmi.net.
“Ne po humbnim, pastaj donim ta kthenim rezultatin. Nëse goli do të ishte i rregullt për 1:1, do të ishim kthyer në lojë. Ne e kontrolluam lojën për një kohë të gjatë, ata patën një goditje në portë nga distanca. Po, është padyshim një pjesë e madhe e humbjes, por nuk mund të fajësojmë për të gjithë faktin që pati një karton të kuq. Mund të kishim shënuar gola të tjerë” – shtoi ai.
Pas kësaj fitore Shqipëria mbetet në vendin e parë me 13 pikë dhe i duhen vetëm dy pikë nga dy ndeshjet e fundit për të siguruar kualifikimin në Euro 2024.
Polonia fitoi ndaj Ishujve Faroe dhe merr vendin e dytë me nëntë pikë kurse, Çekia mbetet në vendin e tretë.
