Prokurori i Prokurorisë Speciale, Bekim Kodraliu, ka thënë se Fatmir Sheholli, bazuar në provat e siguruara deri më tani, i ka ofruar ndihmë shërbimit inteligjent serb, konkretisht një zyrtari të lartë të BIA-s, në një mision që dyshohet se kishte për qëllim dëmtimin e një apo disa figurave politike në Kosovë, para zgjedhjeve të mbajtura në vend.
Në një intervistë ekskluzive për RTK-në, Kodraliu ka thënë se bëhet fjalë për zyrtarin e lartë të BIA-s për kundërterrorizëm, Bojan Dimiq.
“Fatmir Sheholli, në bazë të provave që kemi siguruar deri më tani, ka ofruar ndihmë për shërbimin inteligjent serb, konkretisht për zyrtarin e lartë të BIA-s për kundërterrorizëm, Bojan Dimiq, në implementimin e një misioni me qëllim të dëmtimit të një apo disa figurave politike në Kosovë. E, çka është më e rëndësishmja, dëmtimi është synuar të shkaktohet para zgjedhjeve që janë mbajtur në Kosovë”, ka thënë Kodraliu.
I pyetur nga RTK-ja nëse bëhej fjalë për dëmtim të reputacionit apo edhe në aspektin e sigurisë, Kodraliu nuk ka dhënë më shumë informacione lidhur me rastin.
“Ka pasur rol direkt në themelimin e institucioneve të Republikës së Kosovës, por edhe njëherë kërkoj mirëkuptim, nuk mund të japim më shumë informacion lidhur me këtë rast”, ka thënë prokurori Kodraliu.
