Komuna e Prishtinës ka reaguar për situatën e krijuar me mbeturinat në kryeqytet me rastin e grevës së punëtorëve të ndërmarrjes “Pastrimi” duke thënë se janë duke u munduar të gjejnë një zgjedhje sa më të shpejtë të mundshme.
Drejtori i Shërbimeve Publike në Komunën e Prishtinës, Ilirik Musliu, deklaroi para gazetarëve se kanë marrë mbështetje nga Komuna e Ferizajt me makineri si dhe janë duke komunikuar me operatorët ekonomikë që janë të kontraktuar për mirëmbajtje rrugore, për të larguar mbeturinat nga qyteti.
Punëtorët e kompanisë “Pastrimi” janë në grevë dhe kërkojnë rritje të menjëhershme të pagave. Mirëpo bordi i kësaj kompanie ka premtuar se rritja e pagave do të ndodhë nga muaji maj.
Musliu tha se ka takuar punëtorët e kësaj ndërmarrjeje, porse nuk ka hasur në bashkëpunimin e tyre.
Ai ka fajësuar edhe Qeverinë e Kosovës që ka rritur çmimin e deponisë për “Pastrimin” duke ia pamundësuar kësaj të fundit të rrisë menjëherë pagat për punëtorët për shkak të obligimeve ndaj deponisë ku dërgohen mbeturinat.
“Dje jemi informuar që ka organizim të një greve për shkak se disa kategori të punëtoreve në ndërmarrjen ‘Pastrimi’ kanë kërkesë për rritje të pagave. Dhe ne sot bashkë me nënkryetaren e kemi vizituar ndërmarrjen, jemi takuar me kryetarin e sindikatës dhe me disa përfaqësues të tjerë në ndërmarrjen ‘Pastrimi’ me qëllim që nga afër t’i dëgjojmë kërkesat që kanë. Ne aty kuptuam që në muajin shkurt të këtij viti, sindikata ka deponuar një kërkesë për rritje të pagave në menaxhment, ku në ketë rast menaxhmenti ka reaguar menjëherë më krijimin e një komisioni i cili ka bërë analizimin dhe verifikimin e këtyre kërkesave te cilat pastaj i ka përcjellë tek bordi. Bordi ka marrë një veprim, i ka treguar sindikatës që munden ta bëjnë një lëvizje në pagë mirëpo jo para muajit maj, për arsyeje se kanë pasur disa kalkulime financiare, kanë edhe obligime ndaj deponisë. Gjithashtu kemi bërë thirrje si Komunë për një analizë financiare për çmimin e faturës, duke ditur që kemi një rritje të shpenzimeve, kostove operative edhe në ndërmarrjen ‘Pastrimi’ por edhe në komunat e tjera në vend kanë bërë një lëvizje të tillë, por lëvizjen më të madhe e ka bërë qeveria, e cila ka rritur çmimin e deponisë karshi ndërmarrjes pastrimi”, theksoi Musliu.
“Nuk kemi gjetur bashkëpunim dhe gatishmëri prej sindikatës që të presin deri në muajin maj. Ne si Komunë nuk do të qëndrojmë duarkryq, do të marrim të gjitha masat me qëllim që të ofrojmë shërbim, të grumbullohen mbeturinat. Po ashtu kemi marrë një mbështetje prej Ferizajt, i cili është duke na ndihmuar me makineri dhe në të njëjtën kohë me kontratat tona që i kemi të mirëmbajtjes rrugore kemi kërkuar nga këta operatorë të dalin me makineritë me të cilat i kanë, të cilat mund të shërbejnë për të bërë grumbullimin e mbeturinave”, tha Musliu.
Mes tjerash, Musliu tha se bllokadat e tilla nuk janë formë për të gjetur zgjidhje me kërkesat që kanë.
Ai ka shtuat se për 15 vite ndërmarrja ka pas menaxhim të tillë, dhe duhet kohë në përmirësim të saj.
“Për Komunën ka qenë e befasishme për arsyeje se nuk jemi pajtuar me mënyrën që sot për sot me pas grevë. Ne ishim të hapur dhe ishim mbrapa vendimit qe ka marrë bordi që nga muaji maj të fillojë me rritje, mirëpo jo në formatin që jemi tani por të dalin në punë dhe ne të bisedojmë me përfaqësuesit derisa të bëjmë një zgjidhje, mirëpo edhe kjo nuk ishte e pranueshme prej tyre… Bllokadat e tilla nuk janë formë për të gjetur zgjidhje me kërkesat që kanë, është dashtë që shërbimi të vazhdojë… Po ashtu ndërmarrja ‘Pastrimi’ nuk është tani në këtë gjendje por është një ndërmarrje të cilën e kemi trashëguar të tillë. Me rreth 15 vite ka pas një keqmenaxhim të tillë i cili e ka sjellë ndërmarrjen në një situatë tillë pa stabilitet financiar, pa makineri e ne të cilën ne prej fillimit e kemi trajtuar me prioritet”, tha Musliu.
Musliu tha se do të bëjnë të pamundurën që deri nesër të ketë një vendim për të vazhduar punën kjo ndërmarrje.
“Do të bëjmë maksimumin që deri nesër në mëngjes me pas një vendim të tillë dhe të ulemi në tavolinë sërish me sindikatën me një vendim që të vazhdojnë punën dhe a mundemi përfundimisht t’i japim zgjidhje këtij problemi, i cili në të njëjtën kohë edhe përgjegjësia është e madhe pasi ka të bëjë me shëndetin publik në kryeqytet për arsyeje se mund të vijmë deri tek një infeksion apo edhe të diçka më e keqe”, shtoi Musliu.
Punëtorët e “Pastrimit” prej të hënës kanë mbajtur grevë për ngritje të pagave dhe për shkak të kësaj ata nuk kanë dalë të mbledhin mbeturinat.
Nga kompania “Pastrimi” për KosovaPress kanë konfirmuar se greva është duke vazhduar edhe sot.
Si pasojë e kësaj greve, pranë kontejnerëve në Prishtinë vërehet sasi e madhe e mbeturinave.
Gjatë së martës, reagoi edhe Qendra e Lëvizjes Vetëvendosje në Prishtinë që akuzoi kryetarin e Prishtinës, Përparim Rama, për ditët më të rënda të Prishtinës me mbeturina.
