Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka pritur në takim një delegacion nga Bangladeshi, me të cilin ka diskutuar për marrëdhëniet ekonomike dhe mundësitë për zgjerimin e bashkëpunimit ndërmjet dy vendeve, përcjell KosovaPost.
Kusari-Lila tha se delegacioni kryesohej nga ambasadori Md. Nazrul Islam dhe S.M. Mahbubul Alam, të shoqëruar nga ambasadori i Kosovës në Bangladesh, Lulzim Pllana.
“Diskutuam për marrëdhëniet ekonomike mes Kosovës dhe Bangladeshit dhe mundësitë konkrete për zgjerimin e bashkëpunimit, me fokus të veçantë në industrinë farmaceutike, bioteknologji dhe teknologjinë informative”, shkroi Kusari-Lila.
Ajo bëri të ditur se një pjesë e diskutimit iu kushtua krijimit të mundësive të reja biznes me biznes, përfshirë bashkëpunimin ndërmjet Odës Ekonomike të Kosovës dhe Dhomës së Tregtisë së Dakës, si dhe mundësisë që kompanitë nga Bangladeshi të hapin linja prodhuese në Kosovë.
“Kosova ofron një mjedis të përshtatshëm për investime, për shkak të afërsisë me tregun e BE-së, politikave fiskale, fuqisë punëtore konkurruese, si dhe qasjes në tregjet evropiane përmes CEFTA-s dhe EFTA-s”, tha Kusari-Lila.
Ajo tha se është diskutuar edhe nisja e procesit për një marrëveshje dypalëshe të tregtisë së lirë.
“Po ashtu, diskutuam nisjen e procesit për një marrëveshje dypalëshe të tregtisë së lirë, e cila do të krijonte mundësi të reja për rritjen e shkëmbimeve tregtare dhe investimeve ndërmjet dy vendeve”, shkroi Kusari-Lila.
