Ministrja e Drejtësisë e Kosovës, Albulena Haxhiu, ka pritur në takim ambasadorin e Türkiyes në Prishtinë, Tunç Angılı, transmeton Anadolu.
Siç njofton Ministria e Drejtësisë, ministrja Haxhiu fillimisht e ka uruar ambasadorin Angılı për përgjegjësitë e reja si ambasador dhe njëherit e falënderoi për mbështetjen e palëkundur që Türkiye i ka dhënë dhe vazhdon t’i jep Kosovës në fusha të ndryshme dhe veçanërisht në sektorin e drejtësisë.
Në takim me ambasadorin Angılı, ministrja Haxhiu ka biseduar për reformat në sistemin e drejtësisë, progresin e arritur në këtë drejtim, si dhe hapat e mëtutjeshëm në realizimit të objektivave sa i përket sektorit të drejtësisë.
Ministrja Haxhiu dhe ambasadori Angılı diskutuan edhe për bashkëpunimin dypalësh në fushën e drejtësisë dhe sigurisë, si dhe për rritjen e mundësive për shkëmbim të përvojave në mes të dy shteteve.
Takimi u përmbyll me vullnetin e dy palëve për intensifikim të marrëdhënieve dhe thellim të bashkëpunimit për një partneritet të mirëfilltë në fushat me interes të përbashkët.
