Ndërsa opinioni publik po gëlon nga debatet e zjarrta rreth të drejtave të grave në shoqëri, pozita e këtyre të fundit, nuk është që po përmirësohet aq shpejt, shkruan Kosova Post.
Masat e reja për parandalimin dhe luftimin e pandemisë COVID-19, të ndërmarra së fundi nga Qeveria e Republikës së Kosovës, janë duke u shpërfillur nga disa ndërmarrje private. Kjo po bëhet edhe në kurriz të grave të punësuara.
Në vendimin e fundit të qeverisë, i datës 18. 08. 2021, specifikohet qartë që:
“Gratë shtatzëna, lirohen nga obligimi për t’u paraqitur fizikisht në punë. Punëdhënësit publikë apo privat udhëzohen të ju krijojnë mundësinë që të punojnë nga shtëpia, për aq sa është e aplikueshme.”
Por Kosova Post ka siguruar disa dëshmi të disa grave shtatzëna të punësuara në sektorin privat, të cilat janë detyruar të shkojnë në vendin e punës, përkundër vendimit të qeverisë. Për më keq, disa nga to, përveç që janë detyruar të paraqiten fizikisht në vendin e punës, janë infektuar edhe me COVID-19.
Kosova Post është interesuar të mësojë nëse nga Instituti Kombëtar i Shëndetit Publik (IKShPK), ka informacione të seleksionuara, nëpërmjet të cilave do të mësohej më qartë nëse ky fenomen është më i përhapur, se sa indikacionet që vijnë nga dëshmitë e siguruara nga agjencia.
Drejtori i IKShPK-së Naser Ramadani për Kosova Post tha që të dhënat që ata i posedojnë, nuk janë të seleksionuara deri në at nivel, sa të kuptohet nëse të infektuarat janë të punësuara apo jo, përndryshe “të dhënat do t’i ndanim me opinionin, pa ngurrim!”.
Agim Millaku, Zv. Kryeinspektor për Siguri në Punë, tha që nuk ka pasur ndonjë rast konkret, ku ankesat nga punëtoret gra, janë adresuar te Inspektoriati i Punës. Rasti i vetëm i këtyre ditëve, ka të bëjë, sipas tij, me Sindikatën e Aeroportit, çështje të cilën tha se janë duke e hetuar.
“Ne jemi çdo ditë në terren, por nuk kemi hasur në raste të tilla” – tha ai, duke e siguruar opinionin se, po qe se do të vërenin shkelje të kësaj natyre, do të ndërmerrnin masa ndaj punëdhënësve.
As nga Klinika Gjinekologjike – Obstetrike nuk kanë ofruar diçka më shumë se kaq. Sipas informatave zyrtare, atje aktualisht janë të shtrira 25 gra. Kryeinfermierja Sabrije Ramabaja, në një prononcim për Kosova Post sqaroi se për momentin nuk i posedojnë të dhënat e detajuara rreth këtyre pacienteve.
“Për neve për momentin është e rëndësishme jeta e tyre dhe pak çon peshë fakti nëse ato janë të punësuara apo jo” – tha kryeinfermierja, duke shtuar se “për momentin, gjendja e tyre është shumë e rëndë!”
Sipas Anketës së Fuqisë Punëtore për vitin 2020, e publikuar nga Agjencia e Statistikave e Kosovës (ASK), shkalla e punësimit te femrat (gratë), mbetet e ulët, me vetëm 14.1%. Sektorët më atraktivë për to mbeten ai i arsimit, tregtisë dhe kujdesit shëndetësor (me 52.7%).
Kjo do të thotë se trendi ka mbetur negativ, këtu e sa vite. E kur kësaj përqindjeje i shtohet fakti se të punësuarat trajtohen keq nga punëdhënësit, si në rastin konkret, situata bëhet edhe më dramatike. Viktimat që e nxitën shkrimin e këtij artikulli, hezitojnë të dalin publikisht e t’i denoncojnë punëdhënësit, nga frika se mos po ndëshkohen nga ta. E në opinionin publik, probleme të kësaj natyre, as që janë identifikuar./ImerTopanica/KosovaPost/