Ministria kroate e Punëve të Jashtme dhe Evropiane ka rekomanduar që qytetarët e saj të shtyjnë të gjitha udhëtimet jo thelbësore për në Serbi.
Në njoftimin e sotëm, Ministria rekomandoi që qytetarët kroatë “të tregojnë kujdes të shtuar, të monitorojnë situatën aktuale dhe të marrin informacion më të detajuar para se të udhëtojnë, veçanërisht në dritën e veprimeve të papërshtatshme dhe të pabazuara të regjistruara nga autoritetet e Republikës së Serbisë ndaj qytetarëve kroate.
“Duke pasur parasysh se bllokimet e rastësishme të rrugëve shpesh ndodhin për shkak të protestave civile, është e rëndësishme të mbahet mend se është e pamundur të vlerësohet paraprakisht situata e trafikut dhe rrethanat e mundshme rënduese që mund të ndikojnë ndjeshëm në rrjedhën e lëvizjes në të gjithë vendin. Ne u këshillojmë veçanërisht qytetarëve kroatë të shmangin vendet ku mblidhen një numër i madh njerëzish”, njoftoi ministria kroate.
Në çdo kohë, në rast të një emergjence ose një rasti urgjent jashtë orarit zyrtar, qytetarët kroatë kanë të drejtë të kontaktojnë Ambasadën e Republikës së Kroacisë në Republikën e Serbisë nëpërmjet linjës telefonike 0038163485757, transmeton Telegrafi.
“Vendimi për të udhëtuar jashtë vendit është përgjegjësi personale e secilit individ. Rekomandimet dhe paralajmërimet për udhëtim jashtë vendit të publikuara në faqen publike të internetit të Ministrisë së Punëve të Jashtme dhe Evropiane të Republikës së Kroacisë janë të natyrës këshilluese”, thuhet në të.
Ditët e fundit, në Serbi janë organizuar bllokime rrugësh në përgjigje të thirrjes për “mosbindje civile” nga studentët në bllokim, pas një proteste të madhe më 28 qershor që kërkonte shpalljen e zgjedhjeve.
Policia ndërhyri duke hequr bllokadat dhe duke bërë arrestime, pas të cilave partitë opozitare dhe studentët akuzuan autoritetet për përdorim “brutal” të forcës.
Para përshkallëzimit të tensioneve në Serbi, autoritetet dëbuan artistë dhe qytetarë nga vendet fqinje që mbështetën protestuesit në Serbi.
Në tre muajt e parë e gjysmë të vitit 2025, 12 qytetarë kroatë morën një vendim për dëbim nga Serbia, sipas të dhënave nga Ambasada Kroate në Beograd.
Kryeministri kroat Andrej Plenkoviq tha në prill se 16 qytetarë kroatë ishin dëbuar nga Serbia dhe se 16 të tjerë nuk ishin lejuar të hynin në vend, pa specifikuar në cilën periudhë.
