Kryeministri i Kosovës, Albin Kurti takoi ish-mundësin, kampionin olimpik Shaban Tërstena, ndërsa kanë diskutuar gjerë e gjatë për temat që lidhen me sportin, përcjell Kosova Post.
Kurti ka shtruar drekë për legjendën shqiptare të sportit, Shaban Tërstena, ndërsa përmend arritjet e tij dhe fitoren e medaljes së artë në moshën 17 vjeçare.
Duke radhitur sukseset e Tërstenës, kryeministri lartësoi figurën e ish-kampionit olimpik, evropian dhe fituesin e shumë medaljeve në mundje.
“Kampion olimpik në mundje në Lojërat Olimpike në Los Angeles më 1984. Aty u bë shqiptari i parë me medalje të artë olimpike, dhe mundësi më i ri i artë në botë në atë kohë. 40 vjet pas, vazhdon të mbetet medalisti më i ri olimpik shqiptar, me vetëm 19 vjet 7 muaj dhe 6 ditë. Po ashtu ishte i argjendtë në Lojërat Olimpike në Seul në vitin 1988”, tha Kurti.
Gjatë takimit kryeministri përveç për arritjet e Tërstenës, ka folur edhe Lojërat Olimpike, Lojërat Mesdhetare “Prishtina 2030” dhe shumë tema të tjera.
Postimi i plotë i Kryeministrit Kurti në Facebook:
Erdhi nga Shkupi. Si atje, si në Prishtinë, Shaban Tërstena është njëri nga sportistët më të mëdhenj e më të stolisur shqiptar. Kampion olimpik në mundje në Lojërat Olimpike në Los Angeles më 1984. Aty u bë shqiptari i parë me medalje të artë olimpike, dhe mundësi më i ri i artë në botë në atë kohë. 40 vjet pas, vazhdon të mbetet medalisti më i ri olimpik shqiptar, me vetëm 19 vjet 7 muaj dhe 6 ditë. Po ashtu ishte i argjendtë në Lojërat Olimpike në Seul në vitin 1988.
Gjatë bisedës tregoi se si trajnerët e zbuluan talentin e tij qysh në moshë të hershme, duke e shtyrë atë që si i ri të përballej me kundërshtarë në moshë shumë më të madhe se ai. Fuqia dhe pjekuria e tij e parakohshme, e bëri atë që të fitojë medalje botërore kur i kishte vetëm 17 vjeç. Ndërkohë nuk munguan as titujt kampion të Evropës.
Për Kosovën tha se organizimi i Lojërat Mesdhetare të vitit 2030, është një sukses i jashtëzakonshëm i cili lë prapa shumë shtete të tjera të rajonit e më gjerë. Këtë vlerësim, ai e bëri si kampion i trefishtë i Lojërave Mesdhetare në tri edicionet e njëpasnjëshme 1983, 1987 dhe 1991.
Mban një rekord mbresëlënës të fitoreve. Nga gjithsej 741 duele, në mbi 96% prej tyre doli fitimtar.
Gjeneratat më të vjetra e njohin mirë dhe e mbajnë në mend për stilin e tij të njohur “Kobra”. Ndërsa sportistët e rinj kanë shumë se çka të mësojnë nga rruga e kampionit olimpik, siç edhe e ka titulluar librin e tij monografik.
