Kryetari i Parlamentit të Iranit, Mohammad Bagher Qalibaf, ka thënë se SHBA-ja duhet të përmbushë angazhimet e saj sipas memorandumit të mirëkuptimit të Islamabadit përpara se Teherani të ndërmarrë hapa për rihapjen e Ngushticës së Hormuzit, transmeton Anadolu.
“Amerikanët duhet të përmbushin angazhimet e tyre në mënyrë që ne të mund të vijojmë me rihapjen e Ngushticës së Hormuzit”, ka thënë Qalibaf gjatë një takimi në Teheran me Basem Naim, një zyrtar i lartë të Hamasit përgjegjës për marrëdhëniet islame, raportoi agjencia iraniane e lajmeve ISNA.
Duke iu referuar negociatave mes Iranit dhe SHBA-së, Qalibaf ka deklaruar se Teherani nuk e refuzon diplomacinë, por i konsideron negociatat si një mjet në kuadër të përballjes së tij më të gjerë.
“Ne nuk i refuzojmë negociatat, por negociatat janë një mjet për përpjekjen”, tha ai, duke shtuar se braktisja e përballjes me SHBA-në dhe Izraelin në format e saj të ndryshme do të nënkuptonte “disfatë”.
Qalibaf iu referua gjithashtu memorandumit të Islamabadit mes Teheranit dhe Washingtonit, duke thënë se dispozita e tij e parë theksonte përfundimin e luftës kundër Iranit dhe aleatëve të tij në atë që Teherani e quan “fronti i rezistencës”.
Ai pretendoi se pala amerikane kishte paraqitur fillimisht një propozim me 15 pika, i cili kërkonte ndalimin e plotë të aktiviteteve raketore dhe bërthamore të Iranit, si dhe të mbështetjes së tij për grupet aleate në rajon.
Irani dhe SHBA-ja nënshkruan një memorandum mirëkuptimi në Islamabad më 18 qershor, pas ndërmjetësimit të Pakistanit dhe Katarit, duke përcaktuar dispozita lidhur me përfundimin e armiqësive, lundrimin përmes Ngushticës së Hormuzit dhe negociatat e mëtejshme mes Teheranit dhe Washingtonit.
Zyrtarët iranianë që atëherë kanë akuzuar Washingtonin se nuk i ka zbatuar angazhimet e tij dhe e kanë lidhur rihapjen e plotë të Ngushticës së Hormuzit me respektimin e marrëveshjes nga SHBA-ja.
Teherani ka vazhduar të mbajë kufizime për lundrimin përmes kësaj rruge strategjike ujore, e cila lidh Gjirin Persik me Gjirin e Omanit dhe është rrugë kyç për transportin global të energjisë.
Zyrtarët iranianë kanë thënë se kushtet e tyre përfshijnë lehtësimin e sanksioneve, lirimin e aseteve iraniane të ngrira dhe përfundimin e operacioneve ushtarake kundër Iranit dhe aleatëve të tij rajonalë.
Në fund të gushtit, zyrtarët iranianë thanë se Teherani dhe Omani po diskutonin për mënyrën e organizimit të kalimit detar përmes ngushticës, duke theksuar se këto marrëveshje nuk nënkuptonin rihapje të plotë të rrugës ujore.
