Kryeministri i Kosovës, Albin Kurti, ka deklaruar se vendi duhet të shmangë zgjedhjet e parakohshme dhe të përqendrohet në përmbushjen e detyrimit kushtetues për zgjedhjen e presidentit.
Në mbledhjen e 11-të të Qeverisë, Kurti theksoi se afati kushtetues për zgjedhjen e presidentit po afrohet dhe kërkoi nga subjektet politike vullnet për zgjidhje dhe gatishmëri për kompromis.
“Kemi hyrë në pjesën e fundit të muajit prill dhe para vetës kemi një afat Kushtetues, i cili po afron. Shkuarja në zgjedhje të parakohshme parlamentare unë besoj që nuk është opsion e zgjedhja e presidentit është detyrë kushtetuese e të zgjedhurve të popullit – kjo kërkon vullnet për zgjidhje, gatishmëri për kompromis dhe vendime jo të lehta”, deklaroi ai.
Kurti ka shtuar se asnjë parti nuk mund të sigurojë shumicë të mjaftueshme për të vepruar e vetme, duke theksuar nevojën për bashkëpunim politik.
“E dimë që nuk ka parti që mund të pretendojë se do t’i fitojë mbi 80 deputetë, andaj duhet të pranohet rezultati i zgjedhjeve dhe nga ato pozicione të zhvillohen diskutime të sinqerta dhe të arsyeshme në interesin më të mirë për vendin tonë”, tha kryeministri.
Ai ka theksuar se Qeveria është e hapur për një zgjidhje që reflekton vullnetin e qytetarëve dhe garanton stabilitet institucional, duke paralajmëruar se një proces i ri zgjedhor mund të sjellë pasoja të panevojshme.
“Ne jemi të hapur për zgjidhje, e cila i përgjigjet vullnetit të qytetarëve. Vendi ka nevojë për stabilitet institucional. Jemi të bindur se një cikël i ri zgjedhor nuk sjell ndryshime të mëdha në rezultat, por mund t’i vonojë punët e mira dhe të na humbasë mundësi e fonde si dhe të krijojë shpenzime të tjera të panevojshme”, ka deklaruar Kurti.
